Гэр бүл, хөдөлмөр, нийгмийн хамгааллын сайд Т.Аубакир  өнөөдөр /2025.10.27/ цаг үеийн асуудлаар дараах мэдээлэл өглөө.

Тэрбээр "Өнөөдөр бүх яамдууд шуурхай хуралдаан зарлаж хуралдаж байна. Харин манай яам хуралдаж урсгал зардлаасаа 10-15 хувийг бууруулах ажлыг судалж байна. Төсвийн байнгын хорооны өрөөнд хурал зохион байгуулагдаж ахмад настны тэтгэвэр, багш, эмч, эмнэлгийн ажилчдын цалинг 15-20 хувь нэмэгдэхэд шаардлагатай төсөв, эх үүсвэрийг хаанаас гаргах талаар хэлэлцэж байна. Уг хурлаар хүүхдийн мөнгөн тэтгэмж хүртэл давхар хөндөгдөж байна. Мөн Нийгмийн даатгалын сан /НДС/-гийн төсвийг бууруулах саналыг Сангийн яам оруулж ирсэн. Үүнээс харахад багш, эмч нарын цалин нэмэхтэй холбоотойгоор хүнд нөхцөл байдал үүсэж байна.

Нэг талаараа багш, эмч нар жагсаал цуглаан зохион байгуулаад цалингаа нэмүүлдэг гэсэн ойлголт үүсэж бусад төрийн алба хаагчид цалингаа нэмүүлэх асуудал үүссэн. Чанартай боловсролыг ирээдүй болсон хүүхдүүдэд эзэмшүүлэхийн тул багш нар чадвартай байх ёстой. Мөн багш нарын цалин өндөр байх ёстой гэдэгтэй хэн ч маргахгүй. Гэвч Монгол Улын төсөв, нөхцөл бололцоо амаргүй байдалд байгаа. Төсвийн байнгын хороонд болж буй хурлын үеэр хүүхдийн мөнгөнөөс эх үүсвэр гаргах талаар ярилцсан. Үүнийг зөвшөөрхгүй гэдгээ илэрхийлсэн. Нийгмийн даатгалын сан руу хүртэл орж байна. Нийгмийн даатгалын сан улсаас татаас авдаг. 2025 оны гүйцэтгэлээр 1.5 их наяд төгрөг байсан. Харин 2026 онд хүргүүлсэн нь найман хувь байсан. Үндсэндээ улсын төсвөөс татаасаар хоёр их наяд төгрөг гарна гэсэн үг.

Харин Гэр бүл, хөдөлмөр, нийгмийн хамгааллын яам урсгал зардлаас тодорхой хэмжэээг хасаж бууруулна. Цай кофе, бичиг цаасны мөнгөнөөс хасалт хийгээд дорвитой мөнгөн дүн гарахгүй. Үүнд зарцуулж буй мөнгөн дүн 100 тэрбум төгрөгөөс хэтрэхгүй байдаг. Өнөөдөр МАН-ын бүлэг, АН-ын бүлэг тал талд хуралдаж үүссэн нөхцөл байдлаас хэрхэн гарах талаар хэлэлцэж байна. Бүлгийн хуралдаанаас гарах шийдвэр бас маш чухал юм. Харин бусад төрийн байгууллагын ажилчид хүртэл цалин нэмэгдүүлэх асуудлыг хөндөж эхэлсэн. Нийгмийн даатгалын сан руу орж болохгүй гэдгийг хэлсэн. Мөн хүүхдийн мөнгөн тэтгэмжээс нэг ч төгрөг хасуулахгүй гэдгээ илэрхийлсэн. Гэхдээ хүүхдийн мөнгө рүү орохоос өөр аргагүй болсон талаар Төсвийн байнгын хорооноос мэдэгдсэн.

2026 онд нэг сая 351 мянган хүүхдэд хүүхдийн мөнгө олгоно гэж тооцоолж 1.5 их наяд төгрөгийг төсөвт суулгасан. Хүүхдийн мөнгө илүү төсөвлөгдсөн шалтгаан нь шинээр хүүхэд төрөх, эндэх тохиолдол байдаг учраас хасах, нэмэх 10 хувь тооцогдож явагддаг. Хүүхдийн мөнгө бол халамж биш юм. Газрын доорх баялгийг тэгш хүртээмжтэй байдлаар хүргэж байгаа асуудал юм.