Ерөнхий боловсролын болон сургуулийн өмнөх боловсролын 20 гаруй мянган багш нар цалингаа нэмэхийг шаардаж, энэ сарын 16-наас эхлэн хугацаагүй ажил хаялт зарлаад байгаа юм. Энэ хугацаанд буюу өнгөрсөн долоо хоногт ЕБ-ын сургуулиуд бие даалтын долоо хоног байсан учир танхимаар хичээллээгүй. Өнөөдрөөс /2025.10.27/ эхлэн танхимаар хичээл эхлэх учиртай. Гэтэл өнөөдрийн байдлаар хэзээ хичээл эхлэх нь тодорхойгүй хэвээр байна. Тодруулбал, МҮЭ-ийн холбооны зүгээс "Бид тэмцлээ үргэлжлүүлнэ. Яамнаас ирүүлсэн хэлэлцээний эхний төсөл дээр бид өөрсдийнхөө хүссэн хэмжээнд цалин нэмэх томъёоллоо хүргүүлсэн. Ирэх 2026 оны нэгдүгээр сарын 1-нээс 3.3 сая төгрөг, үлдсэн нэмэгдлийг долдугаар сарын 1-нээс шийдвэрлэвэл ажил хаялтаа зогсоож, хэлэлцээ эхлүүлэхэд бэлэн гэдгээ хүргүүлсэн. Хэлэлцээ эхлээгүй, нэгдсэн шийдэлд хүрээгүй учраас орон даяар багш нарын ажил хаялт хэвээрээ үргэлжилж байна"  гэсэн юм.

Тэгвэл Боловсролын яам болон Засгийн газраас цалинг 3.5 сая төгрөгт хүргэх боломжгүй, шат дараатай нэмнэ гэдгийг хэлж байгаа юм.

Тиймээс Боловсролын яамны зүгээс, Монголын боловсрол, шинжлэх ухааны үйлдвэрчний эвлэлийн холбооны удирдлагад ажил хаялтыг түр зогсоож, хамтын хэлэлцээг эхлүүлэхийг уриалжээ.

Ирэх оны төсөвт, нийт төрийн албан хаагчдын цалинд 8.3 их наяд төгрөг төсөвлөсөн байна. Үүнээс боловсролын салбарын ажилчдын цалинд 2.8 их наяд төгрөг буюу дээрх зардлын 33.8 хувийг боловсролын салбарын албан хаагчдын цалин эзэлж байгаа аж. Хэрэвзээ, Боловсролын салбарынхны цалинг нэмэгдүүлэхээр болбол, энэ нь ганц багшийн цалингаар зогсохгүй. Өөрөөр хэлбэл, сургуулийн нийгмийн ажилтан, сэтгэл зүйч гэх мэт  тухайн салбарт ажилладаг бүх ажилчдын цалинг нэмэх шаардлага үүсч байгаа юм.

Багш нарын цалинг 3,5 сая төгрөгт хүргэхэд 6,1 их наяд төгрөг шаардлагатай

Багш нарын шаардаж буйгаар цалинг 3.5 сая төгрөг болгож нэмэгдүүлбэл одоогийн 2.8 их наяд төгрөгийн төсөв дээр нэмээд дахин 3.3 их наяд төгрөг шаардлагатай буюу нийт 6.1 их наяд төгрөг шаардлагатай байгааг Боловсролын яамнаас мэдээлсэн байна. Ирэх оны төсөвт Монгол Улсын нийт төрийн албан хаагчдын цалинд 8.3 их наяд төгрөг төсөвлөсөн байгаа юм. Гэтэл багш нарын цалинг 3.5 сая төгрөг болгож 6.1 их наяд төгрөг зарцуулснаар энэ нь   Монгол Улсын нийт төрийн албан хаагчдын цалингийн төсвийн 73.1 хувийг эзлэхээр байгаа аж.

Боловсролын яамны мэдээлснээр, багш нарын цалинг 2026 оны эхний хагаст 2 сая төгрөг, 2026 оны сүүлийн хагаст 2.5 сая төгрөг болгон энэ мэт шат дараатай нэмж 2028 он гэхэд 3.5 сая төгрөг болгох тооцооллыг гаргасан байна.

Тиймээс Монголын үйлдвэрчний эвлэлийн холбооноос шаардсанаар багшийн цалинг шууд 3.5 сая төгрөг болгох боломжгүй учир хэлэлцээ хийх боломж олгохыг уриалав.