Оросыг энхийн хэлэлцээнд ятгахад Хятадын туслалцаа хэрэгтэй гэдгийг Трамп хэллээ. Гэхдээ энэ нь мөрөөдөл төдий зүйл байж ч мэдэх юм. Учир нь Хятад бол Оросын хамгийн том холбоотон. Мөн барууны хориг арга хэмжээнд өртсөн ОХУ-д чухал дэмжлэг үзүүлж буй анд нөхөр нь.

Украины хувьд өнгөрсөн долоо хоног амаргүй байлаа. Яагаад гэвэл АНУ "Tomahawk" пуужингаа өгөхөөс татгалзаж, Европын холбоо ч Оросын царцсан хөрөнгийг Украинд ашиглах асуудал дээр шийдвэр гаргаж чадсангүй. Мэдээж энэ өдрүүдэд агаарын цохилтууд ч тасраагүй.

Орос, Украины дайныг зогсоох нь сүүлийн саруудад Трампын гол анхаарах асуудал болсон. Тэрбээр энэ долоо хоногийн эхээр хэлэхдээ "Владимиртай ярих тоолонд сайхан яриа өрнөдөг. Гэхдээ ямар нэг шийдэлд хүрдэггүй" гэсэн билээ. Эцэст нь тэр Оросын хамгийн том хоёр газрын тосны компанид өнгөрсөн Лхагва гаригт хориг арга хэмжээ авлаа. Энэ бол Трампын засаг захиргаа анх удаа дайнаас болж Оросын асуудалд хөндлөнгөөс оролцсон тохиолдол байв. Газрын тосны компаниудыг хар жагсаалтад оруулах нь алсдаа сөрөг нөлөөтэй байж болох ч Кремль өөрсдийгөө "Хориг арга хэмжээнд дархлаатай" гэж мэдэгдсэн билээ.

Трамп, Ши Жиньпин нар ирэх Пүрэв гаригт уулзахдаа хоёр улсын худалдааны харилцааг голчлон ярилцана. Гэхдээ Украины дайн болон бусад асуудлыг ч орхигдуулахгүй гэдгийг Трамп хэлжээ. Тэрбээр Ши Жиньпинтэй сайн харилцаатайгаа онцлоод, Оросыг ятгах тал дээр туслана гэдэгт нь найдаж байгаагаа илэрхийлсэн байна. Хятадын дарга Ши Жиньпин Путинд хүчтэй нөлөөлөх чадвартай гэж Трамп хэлж байв.