АНУ-ын ерөнхийлөгч Дональд Трамп Оросын “Роснефть” болон “Лукойл” гэх хоёр томоохон газрын тосны компанид хориг арга хэмжээ авсан. Үүнээс хэдхэн хоногийн дараа Оросын ерөнхийлөгч Владимир Путин эдийн засгийн тусгай төлөөлөгч Кирилл Дмитриевийг АНУ руу илгээсэн байна. Энэ нь Дмитриевийн 2022 оноос хойш АНУ-д айлчилж буй хоёр дахь явдал юм. Түүний зорилго бол АНУ-Оросын харилцааны талаарх хэлэлцээг үргэлжлүүлэх аж.

"Axios" сайтын мэдээлснээр, Дмитриев Цагаан ордны төлөөлөгч Стив Уиткофтой энэ Бямба гаригт (2025.10.25) Майамид уулзахаар төлөвлөж байгаа аж. Тэд өмнө нь дөрөвдүгээр сард Вашингтонд уулзах үеэр АНУ түр хугацаанд Дмитриевт тавих хоригоо цуцалж, виз олгож байсан. Дмитриев Баасан гаригийн үдээс хойш АНУ-ын Массачусетс мужийн дээгүүр нисч буй онгоцны газрын зураг бүхий зураг цахим хуудсандаа нийтэлж, Нью-Йорк руу дөхөж яваагаа харуулсан байна. Түүний айлчлал АНУ-ын Конгрессын зарим гишүүд Оростой яриа хэлэлцээг дахин эхлүүлэх сонирхолтой байгаа үед тохиож байна.

 Саяхан Дмитриев “Путин–Трампын хонгил” нэртэй Аляска болон Оросыг холбох далай доорх хонгил барих санаачилга гаргажээ.Үүнийг эв нэгдлийн бэлгэ тэмдэг хэмээн тодорхойлсон байна.

Тэрбээр Элон Маскийн "Boring Company" уг найман тэрбум ам.долларын төслийг найман жилийн дотор хэрэгжүүлж чадна гэж онцолсон байна. Одоогийн байдлаар Оросын Шууд хөрөнгө оруулалтын сангийн тэргүүн Дмитриев өөрийн АНУ дахь айлчлалын талаар олон нийтэд тайлбар хийгээгүй байна.