Хойд Солонгосын удирдагч Ким Жон Ун ОХУ-тай байгуулсан цэргийн ахан дүүсийн харилцаа тасралтгүй урагшилна гэж өнөөдөр (2025.10.24) мэдэгджээ. Тэрбээр Украины Курск мужид Оросын армитай хамт тулалдаж буй хойд солонгос цэргүүдэд зориулсан дурсгалын хөшөөний шав тавих ёслолын үеэр энэхүү мэдэгдлийг хийсэн гэж төрийн мэдлийн "KCNA" мэдээлэв.

Энэ арга хэмжээ нь Украины довтолгооныг няцаахын тулд Оросын талд тулалдсан Хойд Солонгосын цэргүүдэд зориулсан олон нийтийн хүндэтгэлийг илэрхийлэх зорилготой. Ким Жон Ун болон Оросын ерөнхийлөгч Владимир Путин нар харилцан батлан хамгаалах гэрээ байгуулсан. Москвагийн Украиныг бүрэн эзлэн довтлох дайнд дэмжлэг үзүүлэх зорилгоор Хойд Солонгос цэрэг, их бууны сум, пуужин нийлүүлж буй.

Киев болон Сөүлийн эрх баригчдын тооцоолсноор, Хойд Солонгос Орос руу 10 мянга гаруй цэрэг илгээж, үүнийхээ хариуд эдийн засаг болон цэргийн технологийн тусламж авч байгаа аж. Өмнөд Солонгосын Тагнуулын албаны есдүгээр сарын үнэлгээгээр тулалдаанд хоёр мянга орчим Хойд Солонгосын цэрэг амь үрэгджээ.