ХЭҮК-ын дарга Д.Сүнжидээр ахлуулсан ажлын хэсэг өчигдөр /2025.10.23/ түлш борлуулах төвүүдийн үйл ажиллагаатай танилцлаа. Нийслэлийн өрхүүд 2025 оны аравдугаар сарын 01-нээс хагас кокосжсон түлш хэрэглэж эхэлсэн бөгөөд аж ахуйн нэгж, байгууллагууд түүхий нүүрс ашиглахгүй байх зохицуулалт хийгдээд байна. Энэ хүрээнд Комиссын ажлын хэсэг түлш борлуулах төвүүдийн нөхцөл байдал, иргэдийн түлшний хүртээмж, хэрэглээний бодит нөхцөлд дүн шинжилгээ хийжээ.

ХЭҮК-ын дүгнэлтээр Улаанбаатар хотод 176 мянга орчим өрх галлагаатай амьдарч байгаа бөгөөд нөхцөл байдалтай танилцахад 7000 гаруй өрхтэй хороонд хоёр борлуулах цэг ажиллаж байхад, 2000 орчим өрхтэй хороонд гурван цэг байрлах гэх мэт зэрэг зөрүүтэй байгаа нь тогтоогджээ. Түүнчлэн дараах зөрчлүүд идэрсэн байна.

• Түлш борлуулалтын нэг цэгт өдөр бүр 5–10 тонн түлш нийлүүлэгдэж, өрх бүрт өдөрт гурван шуудай, долоо хоногт долоон шуудай түлш олгож байгаа нь иргэдийн хэрэгцээнд хүрэлцэхгүй байна.
• “Хотула” аппликейшнд түлшний үлдэгдэлтэй гэж зааж байгаа ч газар дээр очиход түлш дууссан байх, байршлын мэдээлэл тодорхойгүй байх зэрэг зөрчил илэрч байна.

Мөн иргэдийн зүгээс Хүний эрхийн Үндэсний Комиссын ажлын хэсэгт дараах мэдээллийг өгчээ.

• Зарим иргэдийн хэлснээр хагас кокосжсон шинэ төрлийн түлш нь өмнөх нүүрснээс илч багатай, хурдан шатаж дуусдаг, килограмм жин нь хүрэхгүй байгаа аж.
• Иргэд түлш авахын тулд гэрээсээ хол явж, дараалалд олон цаг зогсох, ажлаасаа хоцрох зэрэг хүндрэл байнга гарч байгаа бөгөөд зарим тохиолдолд 10 гаруй борлуулах цэгээр орсон ч түлш авч чадаагүй байна.

Иймд ХЭҮК-оос нөхцөл байдал хүнд байна хэмээн дүгнэлээ. Тиймээс ХЭҮК-оос холбогдох албан тушаалтнуудад санал, зөвлөмж хүргүүлнэ гэлээ.