Европын орнууд Украинтай хамтран дайныг дуусгах 12 зүйлт энхийн төлөвлөгөөг бэлдэж буйг "Bloomberg" хэд хэдэн эх сурвалжаас эш татан мэдээллээ. Төлөвлөгөөний хэрэгжилтийг Дональд Трампаар ахлуулсан энх тайвны зөвлөл хянах аж. ОХУ гал зогсоохыг хүлээн зөвшөөрөх юм бол украин хүүхдүүд болон дайны олзлогдогсдыг нэн даруй буцаах тухай тус төлөвлөгөөнд дурджээ. Мөн Украин аюулгүй байдлын баталгаа хүлээн авч, Европын холбоонд элсэх зам нь нээгдэхийн зэрэгцээ ОХУ-ын хориг арга хэмжээнүүдийг ч аажмаар суллана.

Төлөвлөгөөний нарийн ширийн зүйлсийг хараахан тохирч дуусаагүй байгаа бөгөөд энэ асуудлаар АНУ-ын зөвшөөрлийг авахын тулд Европын албан тушаалтнууд энэ долоо хоногт Вашингтонд айлчилж магадгүй.

АНУ-ын ерөнхийлөгч Дональд Трамп энхийн хэлэлцээний асуудлаар Унгарын нийслэл Будапештэд Путинтэй уулзах тухай саяхан мэдэгдсэн. Гэвч Цагаан ордны ахлах албан тушаалтан өнөөдөр мэдээлэл өгөхдөө хоёр удирдагчийн уулзалтыг ойрын хугацаанд товлосон зүйл байхгүй гэсэн билээ. Учир нь талууд гал зогсоох нөхцөл дээр харилцан адилгүй байр суурьтай байгаа гэж үзэж байна.