ОХУ-ын баруун хэсгийн Курск мужийн сурагчид Хойд Солонгосын цэргүүдэд талархал илэрхийлэн цаасан дэнлүү хөвүүлжээ. Тэд дэнлүүн дээрээ “Баярлалаа” гэж солонгос хэлээр бичээд Пёньяны Тэдон голоор хөвүүлсэн байна.

Курск мужид байрласан хойд солонгос цэргүүд Украины цэргийн байршлыг тодорхойлох зорилгоор тагнуулын нисгэгчгүй онгоц ашиглаж буйг Киев өнгөрсөн долоо хоногт мэдээлсэн билээ. Хойд Солонгосын цэргүүдийн Курск дахь байлдааны үндсэн даалгавар дууссан боловч Оросын цэргийн үйл ажиллагаанд үргэлжлүүлэн оролцсоор байгааг мөн дурджээ.

Хойд солонгос цэргүүд Курскээс гадна Сумы мужид Оросын пуужингийн цохилтод дэмжлэг үзүүлж байгаа аж. Сумы муж дахь Оросын цэргийн ажиллагаа бүтэлгүйтэж, хүн хүчний ихээхэн хохирол амссан тул Хойд Солонгосын цэргүүдийн нэмэр тус хэрэгтэй байгааг Украин мэдээллээ.

Нисгэгчгүй нисэх онгоц Украины дайнд голлох үүрэг гүйцэтгэж буй. Хойд солонгос цэргүүд Украин дахь дайнд анх оролцож эхлэхдээ, дрон техниктэй харилцахдаа болхи байсныг хэвлэлүүд мэдээлж байлаа. Гэсэн ч тэд хурдтай сурч, дассаныг мөн онцолж байна. Тэд Пёньян болон Вонсан дахь агаарын баазад Оросын сургагч багш нараас сургалт авч буйг Киев өмнө нь мэдээлж байв. Оросын Гадаад хэргийн сайд долдугаар сард айлчлах үеэр албаныхан Вонсан дахь үйл ажиллагааг шалгажээ.