Хойд Солонгос улс өнөөдөр /2025.10.22/ Зүүн тэнгис рүү баллистик пуужин харвасныг Өмнөдийн Штабын дарга нарын нэгдсэн хороо мэдэгдлээ. Тодруулбал, Пёньян өглөөний 08:10 цагийн орчимд хэд хэдэн пуужин харважээ. Эдгээр нь богино тусгалын пуужингууд байсан бөгөөд Жунва, Хойд Хванхэ мужуудаас зүүн хойд чиглэлд харвасан аж.

Дараагийн болзошгүй хөөргөлтүүдэд бэлэн байхын тулд Өмнөдийн арми сонор сэрэмж, тандалт судалгаагаа идэвхжүүлж байгааг мөн Штабын дарга нарын нэгдсэн хороо мэдээллээ. Цаашилбал, пуужингийн талаарх аливаа мэдээллийг АНУ, Японтой нягт хуваалцаж байгаа гэв.

Хойд Солонгосын энэ удаагийн пуужин хөөргөлт нь Өмнөд Солонгосын ерөнхийлөгч Ли Жэ Мёныг албан тушаалаа хүлээж авснаас хойших анхны тохиолдол гэдгээрээ анхаарал татаж байна. Ли Жэ Мён зургадугаар сарын 4-нд албан үүргээ хүлээж авсан бол Хойд Солонгос хамгийн сүүлд тавдугаар сард пуужин харвасан билээ.

Мөн энэ сарын 31-нд Өмнөд Солонгосын Хойд Кёнсан мужид эхлэх Ази-Номхон далайн эдийн засгийн хамтын ажиллагааны дээд хэмжээний уулзалтын өмнөхөн пуужин харвасан нь онцлог юм. Тус чуулганд АНУ-ын ерөнхийлөгч Дональд Трамп оролцох товтой байна.