Японы шинэ ерөнхий сайд Такэичи Санаэ Мягмар гаригийн (2025.10.21) орой анх удаа ард түмэндээ хандан үг хэллээ. Тэрбээр эдийн засагт анхаарал хандуулж, сөрөг хүчний намуудтай хамтран ажиллах зэрэг тэргүүлэх зорилтуудаа онцолсон юм. Нэн ялангуяа хүчирхэг эдийн засгийг бий болгож, гадаад бодлого болон үндэсний аюулгүй байдлын бодлогоор дамжуулан улсын ашиг сонирхлыг хамгаална гэж мэдэгдэв. Тэрбээр улс төрийн тогтвортой байдлыг хангахын тулд Диетэд (Японы парламент) олонхийн суудал бүрдүүлэх зорилт тавьсан. Түүнчлэн, итгэл үнэмшил нь нийцэж байвал сөрөг хүчний намуудтай үргэлжлүүлэн хамтран ажиллахыг уриална гэж онцлов.

Такэичи хэлэхдээ, үнийн өсөлттэй тэмцэх, нөөц нийслэл бүс байгуулах, нийгмийн хамгааллын системийг шинэчлэх, Үндсэн хуулийг өөрчлөх зэрэг бодлогуудыг хэрэгжүүлэх болно гэв. Эдгээр нь Либерал Ардчилсан Нам болон Японы Шинэчлэлийн Намын тохиролцоонд үндэслэж байгаа тул хамтран ажиллах юм. Эдийн засгийн хувьд үнийн өсөлтийг бууруулахыг амлаж байна. Үүнд түр хугацааны шатахууны татварыг яаралтай цуцлах орно. Мөн сөрөг хүчний саналыг сонсож, татваргүй орлогын доод хэмжээг нэмэгдүүлэх замаар иргэдийн санхүүгийн дарамтыг багасгана гэжээ. Түүний засгийн газрын гол зорилтуудын нэг нь хямралын менежментэд хөрөнгө оруулалт хийх юм. Улмаар төр, хувийн хэвшил хамтран эдийн засаг, хүнсний болон эрчим хүчний аюулгүй байдалд хөрөнгө оруулах төлөвтэй байна.

Гадаад бодлогын хувьд, тэрбээр ойрын хугацаанд АНУ-ын ерөнхийлөгч Дональд Трамптай уулзаж, Япон-Америкийн харилцааг улам бэхжүүлэхээ мэдэгдэв. Тэрбээр“Япон-АНУ-ын эвсэл бол манай гадаад бодлого болон үндэсний аюулгүй байдлын тулгын чулуу юм” гэж онцлон мэдэгджээ.