Монголын Боловсрол шинжлэх ухааны үйлдвэрчний эвлэлийн холбооны дарга З.Цогтгэрэл тэргүүтэй багш нарын төлөөлөлтэй өнөөдөр /2025.10.21/ Сангийн сайдын үүрэг гүйцэтгэгч Б.Жавхлан, Боловсролын сайдын үүрэг гүйцэтгэгч П.Наранбаяр, Гэр бүл хөдөлмөр нийгмийн хамгааллын сайдын үүрэг гүйцэтгэч Т.Аубакир нар уулзалт хийж цалин хөлсийг хэрхэн нэмэгдүүлэх боломж байгаа талаар ярилцлаа.

Тухайлбал, Сангийн сайдын үүрэг гүйцэтгэгч Б.Жавхлан “Засгийн газар багш нарын цалинг 2026 оны нэгдүгээр сарын 1-ээс 20 хувь, 2026 оны долдугаар сарын 1-нээс 10 хувиар тус тус нэмэгдүүлэх тооцоолол гаргалаа.  Цалинг энэ хэмжээгээр нэмэхэд бусад бүх салбаруудад нөлөөлж төсөв, төрийн үйл ажиллагаа тодорхой хэмжээгээр хязгаарлагдана. 2027, 2028 онд хүрэх зорилгоо тавиад дунд хугацааны хөтөлбөрөө гаргаж авна. Үүний үр дүнд багш нарын цалинг 3.5 сая төгрөгт хүргэх тооцоололтой байна.

Төрийн албан хаагч нарын цалингийн фонд 7.8 их наяд, үүнээс 2.8 их наяд нь нэг төсвийн ерөнхийлөн захирагч дээр байдаг. Хэрвээ одоо багш нарын цалинг 3.5 сая төгрөгт хүргэх дүн гарвал сууриараа 3.3 их наядаар нэмэгдэнэ. Зөвхөн боловсролын салбарын цалингийн фонд 6 их наяд болно. 200 мянган төрийн албан хаагчийн цалингийн фонд 7.8 их наяд төгрөг байдаг. Тэгэхээр 6 их наяд ямар хэмжээний тоо вэ гэдгийг та бүхэн мэдэж байгаа. Цалин нэмэхээр инфляци нэмэгддэг. Монголбанкны тооцооллоор 1.1 их наядаар нэмэгдэхэд инфляци 1-1.5 хувиар нэмэгддэг. Засгийн газраас УИХ-д 2026 оны төсвийг өргөн барьсан учраас урсгалаас урсгал руу шилжүүлнэ” гэлээ.

Харин Монголын Боловсрол шинжлэх ухааны үйлдвэрчний эвлэлийн холбооны дарга З.Цогтгэрэл “Багш нарын хувьд 30 хувийн нэмэгдэл хүсээгүй. Боловсролын жил болгон зарласан тул багш нарын цалинг 3.5 сая төгрөг болгооч ээ гэдэг санал тавьсан. Та бүхний энэ мэдээллийг улс орон даяар хүргэнэ. Бид шийдвэр гаргах боломжгүй, хамтаараа хэлэлцэнэ. Ер нь бол багш нарын цалинг 30 хувиар нэмэх саналыг хүлээн авах боломжгүй гэлээ.

Сануулахад, багш нар цалингаа 3.5 сая төгрөгт хүргэхийг шаардаж өнгөрсөн долоо хоногийн Пүрэв гаригаас эхлэн ажил хаялт зарласан юм. Ажил хаялт өнөөдөр ч үргэлжилж байна.

Г.ХОРОЛ