Владимир Путин, Дональд Трамп нар ойрын хугацаанд Унгарын нийслэл Будапешт хотод уулзахаар тохирсон билээ. Гэвч Оросын онгоцыг Европын холбооны агаарын орон зайд нисэхийг нь хориглосон, Олон улсын эрүүгийн шүүх Путиныг баривчлах тушаал гаргасан гэсэн хүчин зүйлсээс болоод Кремлийн тэргүүн хэрхэн Унгар хүрэх нь тодорхойгүй байна.

Тэгвэл Франц улс түүнийг болзолгүйгээр гал зогсоосон нөхцөлд л Европын холбооны оронд зорчихыг нь зөвшөөрөх ёстой гэсэн байр суурийг илэрхийллээ.

Францын Гадаад хэргийн сайд Жан Ноэл Баррот хэлэхдээ "АНУ-ын эрх баригчид Оросын албаныхантай яриа хэлэлцээгээ үргэлжлүүлбэл сайн. Гэхдээ тодорхой болгоё. Нөхцөл болзолгүйгээр нэн даруй гал зогсоосон тохиолдолд л Владимир Путиныг Европын холбооны газар нутагт нэвтрүүлье" гэсэн юм.

Унгар улс хэдийгээр Европын холбоо, НАТО-ийн гишүүн ч гэлээ ерөнхий сайд Виктор Орбан нь Кремлийн Европ дахь хамгийн ойрын түнш учир Будапештыг уулзалтын байрлалаар сонгожээ. Путин Турк, Газар дундын тэнгис, Адриатын тэнгисийн дээгүүр найман цаг онгоцоор нисч байж Будапештэд хүрэх болов уу. Учир нь Польш гэх мэт Европын холбооны гишүүн орнууд Путины онгоцыг агаарын орон зайдаа нэвтрүүлэх магадлал бараг үгүй.

Трамп Будапешт дэх уулзалтаар Путинтэй тохирсон нөхцлөө Зеленскийд тулгаж магадгүй гэх болгоомжлол бий. Харин Европын орнууд энэ уулзалтын өмнө Украинтай хамт гэдгээ илэрхийлсээр байна. Тухайлбал, Их Британийн ерөнхий сайд Кейр Стармер ирэх Баасан гаригт Лондон хотноо Украинд цэрэг байршуулах боломжтой орнуудын эвслийн уулзалтыг зохион байгуулна. Энэ уулзалтад Зеленский, Макрон нар оролцох аж.