Европын холбооны эрчим хүчний сайд нар 2027 оны эцэс гэхэд Оросын хийн импортоо зогсооно гэж санал нэгдсэн байна. Энэ нь Оросын түрэмгийлэл эхэлснээс хойш тус улсын эрчим хүчнээс хараат байдлаа бууруулах Европын холбооны өргөн хүрээний зорилтын нэг хэсэг юм. Энэ хүрээнд 2026 оны нэгдүгээр сарын 1-нээс эхлэн Оростой шинэ гэрээ байгуулахгүй. Өмнө байгуулсан богино хугацааны хий нийлүүлэх гэрээ мөн оны долдугаар сарын 17-ны өдөр хүртэл үргэлжилнэ. Харин урт хугацааны гэрээнүүдийг 2028 оны нэгдүгээр сарын 1-ны өдөр хүртэл хэрэгжүүлсэн хэвээр байна. Одоогийн байдлаар Европын холбоо нийт байгалийн хийн хэрэглээнийхээ 13 хувийг Оросоос нийлүүлдэг. Энэ нь жилд 15.75 тэрбум ам.долларын байгалийн хийн импорт юм.

Оросоос байгалийн хий, нефтийг голчлон Унгар, Словак орон импортолдог. Харин Франц, Нидерланд болон Бельги зэрэг улс, орон Оросоос шингэрүүлсэн байгалийн хий (LNG) импортолдог байна. Оросын хийд ихээхэн түшиглэхээс гадна улс төрийн хувьд илүү ойр байдаг Унгар, Словак улс 2026 оноос хэрэгжих шинэ төлөвлөгөөнд таатай хандахгүй байна. Улмаар холбооны зүгээс тус хоёр улсад уян хатан нөхцөлийг санал болгохоор хэлэлцэж байна. Ингэснээр бүх орныг нэг саналтай байлгахад чиглэсэн маргаан гаргахаас сэргийлж байгаа юм.

Европын холбооны сайд нар мөн Оросоос дамжуулах хоолойн хий болон "LNG"-н импортыг үе шаттайгаар багасгах төлөвлөгөөг баталжээ. Одоо Европын парламент 2025 оны сүүл гэхэд эцсийн шийдвэрийг гаргах үлдлээ. Үүний зэрэгцээ, Европын холбоо 2027 оны нэгдүгээр сарын 1-ээс эхлэн Оросын "LNG"-ийг бүрэн хориглох шинэ хориг арга хэмжээний багцыг баталж магадгүй юм. Хориг арга хэмжээ авахын тулд Европын холбооны 27 улс бүгд санал нэгдэх шаардлагатай ч шинэ багц батлахад эсэргүүцэлтэй тулгарах боломжтой. Эвслийн тэргүүн дипломатч Кажа Калласын хэлснээр, энэхүү 19 дэх хориг арга хэмжээний багцыг энэ долоо хоногт багтаан баталж магадгүй.