ОХУ-ын ерөнхийлөгч Владимир Путин болон АНУ-ын ерөнхийлөгч Дональд Трампын Унгарт болох дээд хэмжээний уулзалтад оролцох урилга авах юм бол оролцоход бэлэн байна гэж Украины ерөнхийлөгч Володимир Зеленский мэдэгдэв.

Трамп болон Путин хоёр ойрын хэдхэн долоо хоногийн дотор Унгарын нийслэл Будапештэд уулзахаар төлөвлөж байгаа. Энэхүү уулзалтаар Трамп Украины дайныг зогсоохын тулд энхийн хэлэлцээр хийхийг оролдож байна. “Хэрвээ намайг Будапештэд урьж, гурван талт уулзалт эсвэл Трамп эхлээд Путинтэй, дараа нь надтай уулзах хэлбэртэй байсан ч хамаагүй бид оролцох болно” гэж Зеленский орон нутгийн хэвлэлд онцлон тэмдэглэжээ.

Гэсэн ч тэр Унгар улсыг уулзалт хийх газар болгон сонгосонд шүүмжлэлтэй хандсан. Учир нь Зеленский Унгарын ерөнхий сайд Виктор Орбаныг Украинд тогтмол саад учруулдаг, шударга зууч байж чадахгүй гэж буруутгадаг юм. Тиймээс Турк, Швейцарь, Ватикан зэрэг төвийг сахисан орнуудад гурван талт уулзалт хийхийг илүүд үзэж байгаагаа Зеленский илэрхийлсэн. Мөн тэрбээр 1994 оны Будапештын санамж бичгийг дурсаж, тухайн үед Украин цөмийн зэвсгээсээ татгалзахдаа аюулгүй байдлын баталгаа авсан ч амлалтууд биелээгүй хэмээн анхааруулжээ.

Цагаан ордонд эргэн ирсэн Трамп Украины дайныг хурдан дуусгахын төлөө хичээж байна. Тэрбээр мөн Оросын ерөнхийлөгчийг дахин Аляскад уулзалтад уриад байгаа ч одоогоор ямар нэгэн бодит ахиц гарч амжаагүй байна.