Нас бол зүгээр л тоо. Ялангуяа шаргуу хөдөлмөрлөдөг Нью Жерсигийн нэгэн эмэгтэйн хувьд нас гэдэг тийм ч чухал биш юм. Үнэт эдлэл борлуулагч 101 настай Анн Анжелетти тэтгэвэртээ гарах нас нь өнгөрсөн ч ажлаа хийсэн хэвээр байна. Заримдаа бүр долоон хоногийн зургаан өдөр тэрбээр ажилдаа ирдэг аж. Анн Анжелетти Кресскилд байрлах "Curiosity Jewelers"-ийн эзэн бөгөөд охин, ач охиныхоо хамт дэлгүүр ажиллуулдаг.

"Curiosity Jewelers" дэлгүүр анх 1964 онд үйл ажиллагаагаа эхлүүлсэн бөгөөд долоо хоногийн таван өдөр ажилдаг. Харин Анжелетти ажлын зургаа дахь өдрөө Нью-Йорк хотын 47-р гудамжны тав, зургаадугаар өргөн чөлөөний хооронд байрлах алмаазны дүүрэг рүү очдог байна. Орон нутгийн хэвлэлээс яагаад тэтгэвэртээ гарч, амрахгүй байгаа талаар асуухад "Би тэтгэвэрт гарвал үхнэ" гэж хэлжээ. Мөн "Тиймээс би ажиллахыг илүүд үздэг" гэж олон жилийн хөдөлмөр, ажлын ёс суртахууны тухай ярьж байхдаа онцолжээ.

"ABC 7"-ийн мэдээлснээр, Анжелетти хүүхэд байхдаа Бруклин дахь гэр бүлийнхээ хүнсний дэлгүүрт тусалж, ажлын замналаа эхэлжээ. Хожим хүнтэй сууж, нөхөр нь Дэлхийн хоёрдугаар дайнд тулалдаж байхад Анжелетти тэнгисийн цэргийн флотод ажиллаж эхэлсэн байна. Үүний дараа санамсаргүй байдлаар "Curiosity Jewelers" дэлгүүрийн урдуур явж байхдаа шууд түрээслэх сэдэл төрсөн аж. Тэрбээр "Би хажуугаар нь машинаар явж байсан. Энэ дэлгүүрийг түрээслүүлнэ гэж зар байхаар нь шууд л эзэн рүү нь ярьсан. Түрээсийн үнийг нь асуух үед сард 85 ам.доллар гэж байсан" гэж дурсжээ. Анжелетти хэрхэн урт насалж, ажиллах хүсэл эрмэлзэл дүүрэн байх талаар хэлэхдээ, өөрийгөө халамжлах хэрэгтэй гэсэн байна.

"Чи босох ёстой. Шүршүүрт орох ёстой. Хоол идэх ёстой. Өөртөө анхаарал тавих ёстой. Чи дасгал хийх ёстой. Хэрэв та хийж байгаа зүйлдээ дургүй бол өөрчил" гэж тэрбээр онцлон тэмдэглэсэн байна.