Улаанбаатар хотын төвөөс холгүй орших 32-ын тойрог орчимд саяхныг хүртэл шавар шавхайтай гэр хорооллын гудамжууд дурайдаг байв. Харин өнөөдөр энэ бүсэд 1008 айлын шинэ орон сууц сүндэрлэн босч, оршин суугчдаа хүлээн авахад бэлэн болжээ. Анх 2022 зургадугаар сараас барилга угсралтын ажлаа эхлүүлсэн “Ногоон нуур 1008 айлын орон сууц”-ны төсөл ашиглалтад орнсоор өнгөрсөн Пүрэв гаригт буюу 2025 оны аравдугаар сарын 16-нд, хүлээн авах ёслол болсон юм. 

Төслийн хүрээнд 100 гаруй айлыг чөлөөлж, 4.4 га талбайг хамарсан бүтээн байгуулалтыг гурван жилийн хугацаанд барьж гүйцэтгэжээ.

Тус 1008 айлын орон сууц нь нийт найман блок, 21 давхар цутгамал төмөр бетон хийцтэй бөгөөд газар доороо зоорьтой. Барилгын ажил эхлэхэд хөрсний ус ихтэй байсан учраас 19 цооног өрөмдөж, хөрсний усыг  хатаажээ. Ингэснээр, зоорийн давхар үер усанд автахааргүй болсон байна. Нэг давхартаа нийт зургаан айл байрлах ба 49.95 болон 55.04 м.кв талбай бүхий хоёр өрөө орон сууцтай аж.

Төслийг БНХАУ-ын буцалтгүй тусламжаар хэрэгжүүлсэн бөгөөд дахин төлөвлөлтийн ажил 2019 оноос хойш яригдсан ч цар тахалтай нүүр тулж, хорио цээрээс шалтгаалан хоёр жил алджээ.

Анх 2014 оны наймдугаар сард БНХАУ-ын дарга Си Зиньпин Монгол Улсад айлчлах үеэрээ Монгол Улсад нэг тэрбум юанийн буцалтгүй тусламж олгохоо мэдэгдсэн. Улмаар 2016 оны долдугаар сард Хятадын Ерөнхий сайд Ли Кэцян Монголд айлчлахдаа тусламжийн 350 сая юанийг гэр хорооллыг дахин төлөвлөх төсөлд зарцуулах тохиролцоо хийсэн байдаг.

"ОРОН СУУЦЫГ ХУДАЛДАХГҮЙ"

Тус хорооллын газрыг иргэдээс бүрэн худалдан авсан бөгөөд орон сууцыг түрээсийн байраар түлхүү ашиглах буюу газраа дахин төлөвлөлтөд ашиглуулсан айлуудад түрээс хэлбэрээр санал болгохоор төлөвлөж байна.

Хэдий Нийслэлийн орон сууцны корпораци дээр тогтоолтой ч уг орон сууцанд иргэдийг хамруулах ажлыг Хот байгуулалт, барилга, орон сууцжуулалтын яам хариуцан ажиллах гэнэ. Тиймээс олон нийтийн сүлжээнд нийтлэгдсэн “Ногоон нуур 1008 айлын орон сууцанд иргэдийг хамруулж байна”, “урьдчилгаа төлбөр авч байна”, “түрээсийн гэрээ хийнэ”, “орон сууцыг худалдаанд гаргасан” гэх мэт агуулгатай, албан ёсны эх сурвалжгүй мэдээллүүдэд итгэн залилангийн хохирогч болохгүй байхыг иргэдэд анхааруулж байна.

Хот байгуулалт, барилга, орон сууцжуулалтын яамнаас энэ чиглэлээр журам гаргаж, Засгийн газрын хуралдаанд танилцуулахаар ажиллаж байгаа аж. Ямартай ч дээрх орон сууцыг худалдан, борлуулахгүй гэдгийг албаныхан хэлсэн юм.

Өөрөөр хэлбэл, орон сууцны зориулалт, ашиглалтын талаар ямар нэг шийдвэрийг албан ёсны эрх бүхий байгууллагаас гаргаагүй байгаа бөгөөд иргэдийг бүртгэх, хамруулах, түрээслэх зэрэг асуудал нь одоогоор хэлэлцэгдээгүй, зарлагдаагүй байна. Энэ чиглэлээр батлагдсан журмыг Засгийн газрын хуралдаанд танилцуулсны дараа иргэдэд нээлттэй мэдээлнэ.

"НОГООН НУУР-1008 АЙЛЫН ОРОН СУУЦ" ТӨСЛИЙН ХҮРЭЭНД 6.1 ТЭРБУМААР ЦЭЦЭРЛЭГ БАРИНА 

Тус орон сууцад үйлчилгээний зориулалттай талбай байхгүй бөгөөд бүгд амьдрах зориулалттай аж. Түүнчлэн улсын төвсийн хөрөнгө оруулалтаар 960 хүүхдийн багтаамжтай сургууль, 240 хүүхдийн цэцэрлэг барихаар төлөвлөсөн байна. Өнөөдрийн байдлаар “Ногоон нуур 1008 орон сууц” төслийн хүрээнд Сүхбаатар дүүрэгт 6.1 тэрбум төгрөгөөр цэцэрлэг барихаар гүйцэтгэгчийг сонгон шалгаруулжээ.

Тодруулбал, 2024 оны гуравдугаар сарын 26-ны өдөр тендерийн үнэлгээний дүнг оролцогч байгууллагуудад мэдэгдсэн байна. Тус тендерт нийт дөрвөн байгууллага оролцсон бөгөөд Бриджконстракшн” ХХК гүйцэтгэгчээр шалгарчээ.

Тус компанийн санал болгосон болон тооцсон үнийн дүн нь 6,136,694,437 бөгөөд тендерийн шаардлагад бүрэн нийцсэн гэж үнэлэгджээ.

Тендерт дараах компаниуд үнийн санал ирүүлсэн байна.

• “Хөххайрхан трейд” ХХК-6,468,000,506
• “Гегатера тех” ХХК-6,475,540,690
• “Артуус” ХХК-6,375,699,598

“Ногоон нуур 1008 айлын орон сууц”-ны төслийн гүйцэтгэгчээр БНХАУ-ын “Хятадын хоёр дахь Металлурги групп корпораци” ХХК, ТЭЗҮ, зураг төслийн гүйцэтгэгчээр “Интеллект тауэр” ХХК, Захиалагчийн хяналт хэрэгжүүлэгчээр “Ногоон нуур 1008 айлын төсөл хэрэгжүүлэх нэгж” болон Монголын 20 орчим компани хамтран ажиллажээ.

Гэрэл зургийг О.БОЛОРСУВД