Вашингтон Пост сонинд мэдээлснээр, Оросын ерөнхийлөгч Владимир Путин Украины Донецк бүс нутгийн бүрэн хяналтыг Киев шилжүүлж өгөх юм бол гал зогсоох болно гэдэг нөхцөл тавьжээ. Путин энэ талаар АНУ-ын ерөнхийлөгч Дональд Трамптай Пүрэв гаригт (2025.10.16) утсаар ярих үеэрээ мэдэгдсэн байна.

Донецк нь Украины зүүн хэсэгт орших стратегийн чухал бүс нутаг юм.

Мөн Путин Трампт мэдэгдэхдээ, үүний хариуд Оросын мэдэлд байгаа гэх Запорожья болон Херсон мужийн зарим хэсгийг буцаан өгөхөд бэлэн байгаагаа хэлсэн байна. Вашингтон Пост сонин өндөр түвшний албан тушаалтнуудаас эш татан мэдээлэхдээ, Трамп энхийн хэлэлцээр байгуулах талаар өөдрөг байр суурьтай байгаа ч Путин өмнөх шаардлагаасаа ухраагүй гэжээ. Донецкт ширүүн байлдаан үргэлжилж байгаа бөгөөд Киев улс газар нутгийнхаа аль ч хэсгийг өгөхгүй гэж хатуу татгалзсаар байна.

Трамп, Путин нар ойрын хэдэн долоо хоногт Унгарт уулзаж, Украины асуудлаар дахин хэлэлцэхээр тохиролцсон бөгөөд Путины энэхүү шаардлага нь ирээдүйн гал зогсоох болон энхийн яриа хэлэлцээний чиглэлд нөлөөлж болзошгүй байна.