Өмнөд Солонгосын эрх баригчид луйврын схемд оролцож, хэрцгийгээр амиа алдсан оюутны хэргийг дахин давтуулахгүйн тулд шуурхай арга хэмжээ авч эхэлсэн. Мөн бусад гэмт хэрэгт холбогдсон таван солонгос иргэнийг Камбож улсаас нутаг буцаасан байна. 59 хүний дийлэнх нь Камбожийн цагдаагийн шалгалтын үеэр баригдсан бол таван хүн нь өөрсдөө бууж өгч, схемээс гарч чадсан хүмүүс аж. Улмаар Өмнөд Солонгост буцаж ирснийх нь дараа тэднийг цагдаагийн хэлтэст шалгаж эхэлжээ. Үүнээс гадна эдгээр хүмүүсийг Камбожоос нисэхийн өмнө онгоцон дотор баривчилсан гэх мэдээлэл байна. Учир нь тухайн онгоц нь Өмнөд Солонгосын үндэсний агаарын тээврийнх байсан тул хууль ёсоор тус улсын нутаг дэвсгэр гэж тооцогддог.

Өмнөд Солонгосын үндэсний аюулгүй байдлын зөвлөх хэлэхдээ, зарим хүн албан хүчээр луйврын хэрэгт оролцсон ч ихэнх нь гэмт хэрэг үйлдсэн нь нотолгоотой тул баривчилж байгаа гэжээ. Үүний зэрэгцээ Камбож болон Өмнөд Солонгос улс онлайн луйврын болон кибер гэмт хэрэгтэй тэмцэх хамтын ажиллагаагаа улам бэхжүүлэхээр тохиролцсон байна. Энэ нь АНУ-ын засгийн газар Камбожийн крипто луйврын хэргийг шалгаж, 14 тэрбум ам.долларын биткойныг хураасан гэж мэдээлэгдсэний дараахан тохиожээ. Бүс нутгийн луйврын төвүүд крипто болон хайрын (romance) луйврын олон төрлийн гэмт хэрэг үйлддэг бөгөөд жил бүр хэдэн тэрбум ам. долларын ашиг олдог байна.