Украины ерөнхийлөгч Володимир Зеленский нэмэлт зэвсгийн тусламж горилон Вашингтонд айлчилсан билээ. Тодруулбал, тэрбээр Оросын нутаг дэвсгэрийн гүнд цохилт өгөх чадвартай "Tomahawk" пуужинг АНУ-аас хүссэн юм. "Tomahawk" пуужингаар Оросын гүн дэх газрын тос, эрчим хүчний байгууламжуудад цохилт өгч, дайны санхүүжилтыг нь таслан зогсоох боломжтой гэж үзэж байсан.

Харамсалтай нь, Баасан гаригт Трамп, Зеленский нар уулзсан боловч Украины ерөнхийлөгчийн хүсэл талаар болжээ. "Tomahawk" пуужингүйгээр дайныг зогсоох аргыг олно гэж найдаж буйгаа Трамп илэрхийлсэн байна. Энэ пуужин АНУ-д ч хэрэгтэй гэдэг өнцгийг тэр дэвшүүлээд буй.

Түүгээр ч зогсохгүй Трамп дайтагч талуудыг яг одоогийн байлдааны шугамыг хүлээн зөвшөөрч, гал зогсоохыг уриалаад байна.

Тэрбээр "Байлдааны шугам чинь хаана байна, яг тэндээ зогс. Эс бөгөөс хэтэрхий төвөгтэй болоод байна. Учир нь олдох хөг өнгөрнө шүү. Яг одоо байгаа газраа зогс. Бүгдээрээ гэр гэртээ харь, гэр бүл дээрээ оч, аллагаа зогсоо. Тийм л байх ёстой юм" гэж хэлжээ.

Эцэст нь уулзалтыг үр дүнтэй болсон гэж тодорхойлж буй ч ачир дээрээ Зеленский гар хоосон буцсаныг хэвлэлүүд мэдээлж байна.

Уулзалтын өмнөх өдөр Трамп ОХУ-ын ерөнхийлөгчтэй утсаар ярьж, Унгарт уулзахаар тохирсон билээ. Энэ үеэр Путин түүнд "Tomahawk" пууужин байлдаанд онц нөлөө үзүүлэхгүй, гэхдээ АНУ, ОХУ-ын харилцаанд нөлөөлнө гэж хэлсэн аж.