Хятадын Коммунист нам удахгүй болох намын их хурлын өмнөхөн санхүүгийн ноцтой гэмт хэрэгт сэжиглэгдэж буй шилдэг есөн генералыг намаас хөөж, албан тушаалаас нь түдгэлзүүлжээ. Тэдний дийлэнх нь гурван одтой генералууд бөгөөд намын шийдвэр гаргах төв хорооны бүрэлдэхүүнд багтдаг байв. Генералуудыг хөөсөн нь авлигын эсрэг тэмцлийн нэг хэсэг гэж тайлбарлаж байгаа ч шинжээчид үүнийг улс төрийн цэвэрлэгээ гэж үзэж байна.

Эдгээр есөн албан тушаалтан нь:

• Хэ Вэйдунг – Цэргийн төв зөвлөлийн дэд дарга
• Миао Хуа – Цэргийн төв зөвлөлийн Улс төрийн ажлын албаны дарга
• Хэ Хунжүн – Цэргийн төв зөвлөлийн Улс төрийн ажлын албаны гүйцэтгэх дэд захирал
• Ван Шиубин – Цэргийн төв зөвлөлийн Хамтарсан ажиллагааны удирдлагын төвийн гүйцэтгэх дэд захирал
• Лин Шяньян – Зүүн театрын командлагч
• Цинь Шутун – Армийн улс төрийн комиссар
• Юань Хуажи – Тэнгисийн цэргийн улс төрийн комиссар
• Ван Хубин – Пуужингийн хүчний командлагч
• Ван Чуннин – Зэвсэгт цагдаагийн хүчний командлагч

Эдгээр есөн хүнээс Хэ Вэйдунг нь Ши Жиньпиний дараа орох Хятадын армийн хамгийн өндөр албан тушаалтан. Үүгээрээ хамгийн нэр хүндтэйд тооцогдож байв. Хэ Вэйдунг хамгийн сүүлд гуравдугаар сард олон нийтийн өмнө харагдсан. Түүнийг цэргийн дээд албан тушаалтныг цэвэрлэх ажиллагааны хүрээнд мөрдөн байцаалтад байгаа гэсэн таамаг дэвшүүлээд байв. Тэрбээр мөн Коммунист намын шийдвэр гаргах дээд байгууллага болох Улс төрийн товчооны гишүүн байсан. Улс төрийн товчооноос шалгагдсан анхны гишүүн нь Хэ Вэйдунг болж байна.

Батлан ​​хамгаалах яамны мэдэгдэлд дурдсанаар, эдгээр есөн хүн намын сахилга батыг ноцтойгоор зөрчсөн бөгөөд их хэмжээний мөнгөтэй холбоотой, онц хор хөнөөлтэй албан тушаалын гэмт хэрэгт сэжиглэгдэж байна.

Аравдугаар сарын 20-нд эхлэх намын IV бүгд хуралд хэн хэн оролцохыг олон нийт ажиглах болно. Хэрэв ирц буурсан бол цэвэрлэгээ хэр өргөн цар хүрээтэй болсныг харуулах юм.