Балба улсын иргэн Дэнзэн Норгай тэргүүтэй 35 уулчин 1953 оны тавдугаар сарын 29-нд анх удаа Эверестийн оргилыг зорьж байв. Тэднээс Эдмунд Хиллари, Дэнзэн Норгай нар л Эверестийн оргилд гарсан юм. Харин тэдэнтэй хамт оргилын наана орших сүүлчийн бааз хүртэл гурван шерпа хамт явсны нэг нь Канча шерпа.

Тэгвэл тухайн үеийн уулчдаас ганцаараа амьд үлдсэн байсан Канча шерпа 92 насандаа өөд боллоо. Тэрээр Пүрэв гаригт /2025.10.16/ Балбын Катманду дахь гэртээ нас баржээ.

Балбын уулчдын холбоо түүнийг түүхэн бөгөөд домогт эрхэм гэж тодорхойлжээ. Холбооны тэргүүн Фур Гелже шерпа эмгэнэл илэрхийлэн мэдэгдэл хийхдээ "1953 онд Эверестийн оргилд гарсан уулчдаас үлдсэн хамгийн сүүлчийн уулчин болох Канча шерпа таалал төгссөнд бид гүнээ эмгэнэж байна. Бидэнд нөхөж баршгүй уй гашуу тохиолоо. Түүнийг чин зүрхнээсээ санан дурсах болно" гэсэн юм.

Канча шерпа нас барахаасаа өмнөх хэдэн саруудад хоолойтой холбоотой өвчнөөр шаналж байжээ. Өндөр настай хүн гэхэд өөр томоохон өвчин зовиур байгаагүй гэдгийг түүний ач хүү хэлж буй.

Канча шерпа 1933 онд Эверестийн бэлд орших Намче тосгонд төржээ. Тус тосгоны хүн амын бараг ихэнх нь шерпа буюу уулын хөтөчөөр ажилладаг. Хүүхэд ахуйдаа тэрээр Төвдөд төмс худалдаж, амь зуудаг байжээ. Хожим нь Энэтхэгт очихдоо уулын хөтөчөөр ажиллах саналыг найзуудаасаа хүлээн авч, суралцаж эхэлсэн гэдэг. Түүний аав нь Дэнзэн Норгайтай нөхөрлөдөг байжээ.