Хойд Солонгост улс төрийн хоригдлуудыг хорьдог дөрвөн шорон бий. Өмнөд Пёнган муж, Хойд Хамгёнг мужид байрлах 14, 16, 18, 25 дугаартай эдгээр шоронд 65 мянга орчим хүн шоронд хоригдож, албадан хөдөлмөр эрхэлж байгааг Солонгосын үндэсний нэгдлийн хүрээлэн Баасан гаригт мэдээллээ. 2013 онд гаргасан хамгийн сүүлийн тайланг энэ удаад АНУ-ын хиймэл дагуулын зураг болон Хойд Солонгосоос дүрвэсэн хүмүүсийн ярианд үндэслэн шинэчилжээ.

Хойд Солонгос өнгөрсөн хугацаанд хүний эрхийг хамгийн бүдүүлгээр зөрчдөг улс гэж нэрлэгдсээр ирсэн. Тус улсын эрх баригчид тэрслүү үзэлтнүүдийг тэвчдэггүй бөгөөд гадаадын элдэв мэдээлэлд хатуу хяналт тавьдаг.

Дээр дурдсан 16 дугаартай хорих анги нь Хойд Хамгёнг мужийн Пунггие-ри цөмийн туршилтын талбайн ойролцоо байрладаг. Тиймээс хоригдлуудыг нь цөмийн байгууламжид дайчлан ажиллуулдаг байж магадгүй гэж шинжээчид таамаглажээ.

25 дугаартай хорих ангиас бусад нь гаднаасаа тосгон шиг харагддаг гэдгээрээ онцлог бөгөөд 5800 хоригдлын багтаамжтай.

2013 оны тайланг харвал 80-120 мянга орчим улс төрийн хоригдол байжээ. Өдгөө энэ тоо харьцангуй буурч, 53-65 мянга орчим хүн болсон байна. Гэвч энэ бууралт нь Умардад хүний эрхийн нөхцөл байдал сайжирсантай ямар ч холбоогүй. Гагцхүү харгис хэрцгий байдгаараа алдартай Ёдок хорих лагерь гэгддэг 15 дугаар баазыг хаасантай холбоотой аж.