Соёл, спорт, аялал жуулчлал, залуучуудын сайд Ч.Ундрам цаг үеийн асуудлаар байр сууриа илэрхийллээ. Тэрбээр, Засгийн газрын гишүүдэд үг хэлэх, асуултад хариулах боломж олдохгүй байна. Энэ нь хэтэрхий түрэмгий, сандал суудлын төлөө улайрч байгаа нэг хэлбэр гэж харж байна. Товчхондоо, зохион байгуулалттай жүжиг болж байна. Хэрвээ Төрийн байгуулалтын байнгын хорооны саналаар Ерөнхий сайдыг огцруулах асуудлаар санал хураах юм бол энэ нь Үндсэн хуульд нийцэхгүй. Тиймээс бид өчигдөр /2025.10.16/ Үндсэн хуулийн Цэцэд гомдол гаргасан. Уг гомдлыг Цэц хүлээж авсан, маргаан үүсгэсэн байгаа.

УИХ-ын дэд дарга Х.Булгантуяа дээр Цэцийн маргаан үүссэн байхад УИХ-ын чуулганыг удирдаж байгаа нь зохимжгүй үйлдэл.

Үүнээс гадна УИХ-ын дэгийн тухай хуулиар өнөөдрийн чуулган эхлэхдээ дахин ирц бүрдүүлэх ёстой. Гэтэл өчигдрийн ирцээр 20 гаруй цаг хуралдаад явж байна. Өчигдөр ирцээ бүртгүүлээд явчихсан олон хүн байна. Сүүлдээ бид нарыг согтуу хүмүүсээр "чи хуралдаа суу " гээд доромжилж, утсаар яриулж дарамталж байна. Өнөөдрийн хуралдаанд бид үгээ хэлье гэж бодож орсон. УИХ дээр давхар стандарт явж байна. Өөрөөр хэлбэл, төсөл хэлэлцэх болохоор цаг дууссан гэдэг.

Гэтэл сандал суудлын асуудал хэлэлцэхээр хэдэн цагаар ч хамаагүй хүлээдэг, хойшлуулдаг, 24 цагаар хуралдаж байна.

Дээрээс нь Төрийн байгуулалтын байнгын хороо Г.Занданшатар Ерөнхий сайдыг огцруулах асуудлыг хэлэлцэхдээ индэр дээр суулгаж байгаад л бүх гишүүд асуулт асууж байгаад хэлэлцсэн. Гэтэл Д.Амарбаясгалан даргыг огцруулах асуудлыг хэлэлцэхдээ нэг ч гишүүн асуулт асууж, үг хэлээгүй шууд санал хураасан.