Европын холбооны гадаад бодлогын тэргүүн Кая Каллас Пүрэв гаригт (2025.10.16) эвслийн шинэ дрон эсэргүүцэх хамгаалалтын системийн тухай зарлалаа. Энэ нь Оросоос ирж болзошгүй аюулд 2030 он гэхэд бүрэн бэлтгэлтэй байх төлөвлөгөөний нэг хэсэг юм. Калласын хэлснээр, "Өнөө цагт дрон нь дайны шинж чанарыг бүрэн өөрчилж байна. Дроны эсрэг хамгаалалт бол сонголт биш. Харин зайлшгүй хэрэгтэй зүйл болж хувирсан. Тиймээс 2027 он гэхэд Европын холбоо дрон эсэргүүцэх хамгаалалтын системтэй болно" гэж мэдэгдсэн байна.

Энэ нь Украиныг түрэмгийлж буй Орос цаашид Европын холбоо руу түрэмгийлэх вий гэсэн болгоомжлолоос үүдэлтэй юм.

Европын холбооны шинэ батлан хамгаалах төлөвлөгөөнд дараах зүйлс орж байна. Үүнд:

• Зүүн бүс нутгийн хилийг бэхжүүлэх
• Агаар, сансрын хамгаалалтын системийг бий болгох
• НАТО-той уялдаа, холбоотой ажиллах
• Агаарын болон артиллерийн хамгаалалтын дутууг нөхөж, чадавхыг сайжруулах зэрэг юм.

Орос улс Украин хийж буй дайнаа дуусгасныхаа дараа баруун тийш түрэмгийллээ үргэлжлүүлж болзошгүй гэх айдас Европ даяар нэмэгдэж байна. Калластай хамт мэдэгдэл хийсэн Европын холбооны батлан хамгаалах комиссар Андриус Кубилиус хэлэхдээ, “2030 он гэхэд бид Оросын түрэмгийллээс, дайн гарахаас урьдчилан сэргийлэх, энх тайвныг хамгаалахад бэлэн болох ёстой” гэжээ. Төлөвлөгөөнд мөн "дроны хана" босгох санал орж ирсэн бөгөөд үүнийг хэд хэдэн орон дэмжиж байна. Энэ нь агаарын орон зайд нэвтэрсэн Оросын дроныг илрүүлж, мөрдөн хөөж устгахад чиглэнэ.

Сүүлийн үед Польш, Румын, Эстони зэрэг улс өөрсдийн агаарын орон зайд Оросын дрон болон нисэх онгоц нэвтэрсэн гэж мэдээлсэн. Харин Орос энэ мэдээллийг үгүйсгэж, тэдний ямар ч онгоц олон улсын дүрмийг зөрчөөгүй гэж мэдэгдсэн юм. Нөгөөтээгүүр, АНУ-ын ерөнхийлөгч Дональд Трамп Оросын ерөнхийлөгч Владимир Путинтэй түрэмгийллийн талаар удаан ярилцсан гэж мэдэгдсэн байна. Мөн тун удахгүй Украины ерөнхийлөгч Владимир Зеленскийтэй уулзана гэжээ. Хэрвээ Орос дайн зогсоох алхам хийхгүй бол АНУ урт тусгалт пуужин Украинд нийлүүлж магадгүй гэж Трамп анхааруулсан. Энэ нь Оросын зүгээс “Эсэргүүцлийг нэмэгдүүлж байна” гэж үзэж байгаа юм.

Европын холбооноос гаргасан төлөвлөгөө нь НАТО-тай нягт уялдаатайгаар хэрэгжих юм байна. Батлан хамгаалахын шинэ системийг ирэх долоо хоногт болох Европын холбооны дээд хэмжээний уулзалтаар хэлэлцэн, батлах төлөвтэй байна.