УИХ-ын гишүүн, Аж үйлдвэр, эрдэс баялгийн сайд Г.Дамдинням өнөөдөр /2025.10.17/ цаг үеийн асуудлаар мэдээлэл хийлээ.

Тэрбээр "Монгол Улсын Их хурлын үйл ажиллагаанд Үндсэн хууль зөрчсөн асуудлууд үүсч байна. Тиймээс ардчилсан тогтолцоотой улсын хувьд үүсээд байгаа асуудлыг Үндсэн хуулийн хүрээнд явуулмаар байна. Унах босох нь хэнд ч хамаагүй. Үндсэн хуулийн хүрээнд ажлаа явуулж, асуудлаа шийдэж байж бид зөв зам руугаа орно. Хуулийн дээр гишгэх юм бол энэ улсад найдах зүйл үгүй болж, ардчилалд аюул учирна.

Тухайлбал, өнөөдрийн ирц бүрдүүлж хуралдуулах гээд байгаа чуулган бол хууль бус.

Өөрөөр хэлбэл, Монгол Улсын чуулганы хуралдааны дэгийн тухай хуулийн зургадугаар зүйлд, хуралдааны тов, дараалал тогтооход баримтлах журам гэж бий. Үүний 6.2 дугаар зүйлд, нэгдсэн хуралдаан долоо хоног бүрийн Пүрэв, Баасан гаригт 10:00-13:00 цаг, 14:00-18:00 цагийн хооронд хуралдана. Гишүүдийн хувьд өглөө 9:00 цагаас хуралдаа ирж хуралдаанд бэлтгэж тухайн өдөр хуралдах асуудлын хүрээнд хэлэлцэж товлосон асуудлыг ажлын цагт багтаан шийдвэрлэж амжаагүй бол хуралдаанд оролцсон гишүүдийн олонхын саналаар хуралдааны цагийг сунгаж болно" гэж заасан байдаг. Мөн тус хуулийн 6.3 дэх хэсэгт, ажлын зайлшгүй шаардлага гарвал Зөвлөлийн саналыг харгалзан Улсын Их Хурлын дарга нэгдсэн хуралдааныг энэ хуулийн 6.2-т зааснаас бусад ажлын өдөр зарлан хуралдуулж болно гэж заалтууд бий. Гэтэл өчигдөр /2025.10.16/ чуулганы хуралдаан эхлээгүй буюу чуулганы ирц бүрдээгүй. Өөрөөр хэлбэл, одоо үргэлжилж байгаа чуулганы хуралдаан өчигдрийн ирцээр хуралдаж байна. Тиймээс үүнийг хаагаад өнөөдрийнхөөр буюу Баасан гаригийн ирц нээгдэх ёстой. Ингэж өнөөдрийн /2025.10.17/Их хурлын чуулган эхлэх ёстой.

Хоёрдугаарт, өчигдөр Х.Булгантуяа даргын удирдсан чуулганы хуралдаан дээр Цэцийн маргаан үүссэн. Тодруулбал, Монгол Улсын Ерөнхий сайдын хүсэлтийн дагуу "Монгол Улсын Их хурлын дэд дарга, УИХ-ын гишүүн Х.Булгантуяа нь Монгол Улсын Үндсэн хуулийн 43.1 болон 70.1 дэх хэсгийг зөрчсөн эсэх асуудлаар Үндсэн хуулийн Цэцэд маргаан үүсгэсэн. Тодруулж хэлбэл, өчигдрийн Ерөнхий сайдыг огцруулах эсэх тухай асуудлыг ТББХ-ны хуралдааны саналаар огцруулахгүй. Тиймээс Үндсэн хуулийг зөрчсөн гэж үзэж байгаа.

Тиймээс Үндсэн хууль зөрчиж байгаа чуулганы хуралдаанд гишүүд оролцохгүй байх бүрэн эрхтэй" гэлээ.