АНУ-ын ерөнхийлөгч Дональд Трамп Оросын дайныг санхүүжүүлж байгаа улс орнуудад үзүүлэх дарамт шахалтыг нэмэгдүүлэхийг эрмэлзэх болсон. Энэ хүрээнд Оросын газрын тос, байгалийн хийн худалдан авалтаа зогсоохыг Японд уриалж байна.

АНУ-ын Сангийн сайд Скотт Бессент Лхагва гаригт Японы Сангийн сайд Кацүнобү Катотой Вашингтонд уулзсан бөгөөд хоёр улсын эдийн засгийн харилцааны чухал асуудлуудыг хэлэлцжээ. Мөн Японыг Оросын эрчим хүчийг импортлохоо зогсооно гэж найдаж буйгаа АНУ-ын тал илэрхийлсэн байна.

Япон улс газрын тос, байгалийн хийн импортоос ихээхэн хамааралтай хэвээр байгаа билээ. 2023 онд тус улс Оросын шингэрүүлсэн байгалийн хийг импортлоход 582 тэрбум иен буюу 3.9 тэрбум ам.доллар зарцуулсан аж. Энэ нь тус улсын нийт эрчим хүчний импортын ес орчим хувийг эзэлж байна. Мөн онд Япон улс Оросын түүхий нефтийн импортоо зогсоосон боловч дараа нь Байдены засаг захиргаа тусгай хориг арга хэмжээ авснаар Сахалин-2 төслөөс газрын тос, байгалийн хийн импортоо үргэлжлүүлэх боломжтой болсон.

Японы Сангийн сайд Кацүнобү Като Оросын эрчим хүчний импортыг зогсоох тухай Бессентийн саналд шууд хариу өгөхөөс татгалзжээ. Гэхдээ "Их 7"-ийн орнуудтай хамтран ажиллах замаар Украинд шударга энх тайвныг тогтоохын тулд чадах бүхнээ хийнэ гэж мэдэгджээ.

ОХУ-тай эдийн засгийн харилцаагаа багасгахыг АНУ-ын холбоотнуудад шахах тактикийг Трамп Энэтхэгт мөн ашигласан билээ. Энэтхэгийн ерөнхий сайд Нарендра Моди Оросын нефтийг худалдан авахаа удахгүй зогсооно гэж түүнд ам өчиг өгснийг хэвлэлүүд мэдээлж буй.