Энэтхэг улс удахгүй Оросоос газрын тос худалдан авахаа болино гэж АНУ-ын ерөнхийлөгч Дональд Трамп мэдэгдлээ. Энэтхэгийн ерөнхий сайд Нарендра Моди Лхагва гаригт түүнд ийм амлалт өгсөн аж. Гэхдээ үйл явцыг шууд эхлүүлэх боломжгүй, бага зэрэг хугацаа орно гэдгийг Трамп онцлов.

2022 онд Украин дахь дайн эхэлснээс хойш Энэтхэг улс Оросын нефтийн томоохон импортлогч болсон. Трамп өнгөрсөн наймдугаар сард ОХУ-аас түүхий нефть, нефтийн бүтээгдэхүүн худалдан авсных нь төлөөсөнд Энэтхэгийн импортын татварыг 50 хувь болгон нэмэгдүүлсэн билээ. Энэ нь мэдээж Украин руу түрэмгийлсээр байгаа ОХУ-д эдийн засгийн нэмэлт дарамт үзүүлэх зорилготой.

Трампад өгсөн сүүлийн амлалтын тухайд Энэтхэгийн засгийн газар хараахан тайлбар хийгээгүй байна. Энэтхэгийн нефтийн худалдан авалт зогсох нь Оросын дайны санхүүжилтэд ихээхэн нөлөө үзүүлж магадгүй юм.