НЭМЭЛТ:

АН-ын дарга О.Цогтгэрэл:

-Би Ерөнхий сайдын өрөөнд ороогүй. УИХ-ын чуулганы нэгдсэн хуралдааны ирц бүрдэхийг хүлээж байна. Би өөрийнхөө өрөөнд сууж байна. АН-ын бүлгийн шийдвэрийг хуралд оролцсон гишүүд дагах ёстой. Нийт 34 гишүүн оролцож, 33 гишүүний саналаар шийдвэр гарсан. Одоогоор манай намын зарим гишүүд гэртээ харьсан байна гэж байна. Чуулганы ирц бүрдүүлэх чинь МАН-ын үүрэг шүү. Ардчилсан нам байр сууриа илэрхийлээд ажиллаж байна. Одоогоор манай намын 20 гаруй гишүүн ирцээ бүртгүүлсэн байна.

"УИХ-ЫН ДАРГА, ЕРӨНХИЙ САЙДЫН АСУУДЛЫГ ЗЭРЭГ ХЭЛЭЛЦЭХГҮЙ БОЛ ЧУУЛГАНД СУУХГҮЙ"

Ардчилсан намын бүлгээс гаргасан шийдвэрийг АН-ын дарга О.Цогтгэрэл үдээс хойш танилцууллаа. Тэрбээр, "Ардчилсан намын бүлгээс үдээс өмнө тодорхой байр суурийг илэрхийлсэн. УИХ-ын дарга АН-ын бүлэгт байр суурь илэрхийлсэн. Тиймээс АН-ын бүлгийн хурлыг зарлаж, хуралдуулна. Гэхдээ энэ хоёр асуудлыг хамтад нь шийдвэрлэх ёстой гэх шаардлага хэвээр байгаа. Хамтад нь хэлэлцэж, хамт огцруулахыг АН-ын бүлэгт хүсэлт тавина гэдгийг мэдэгдэж байсан. Үдээс хойш АН-ын бүлэг хуралдаж 42 гишүүнээс 34 оролцсон. Бүлгийн 34 гишүүнээс 33 гишүүний саналаар шийдвэр гаргасан. Харин нэг гишүүд тодорхой хугацааны дараа гаргана гэж мэдэгдсэн. Ерөнхийдөө 34 гишүүн буюу 100 хувийн саналаар АН-ын бүлгийн шийдвэрийг гаргалаа гэж үзэж болно. Энэхүү шийдвэр нь хоёр заалттай.

Нэгт, Монгол Улсын Их хурлын чуулганы хуралдааны хэлэлцэх асуудлын товд УИХ-ын дарга, Ерөнхий сайдыг огцруулах асуудлыг нэгэн зэрэг оруулсан тохиолдолд уг асуудлыг дараалан хэлэлцэж, аль алийг нь огцруулахыг дэмжсүгэй.

Хоёрт, УИХ-ын гишүүдийн олонхын дэмжлэггүй болсон УИХ-ын даргыг огцруулах асуудлыг хэлэлцүүлэх тов, дараалалд оруулаагүй, дараалан хэлэлцэх боломжгүй болсон тохиолдолд УИХ дахь АН-ын бүлгийн гишүүд эдгээр асуудлаар УИХ-ын чуулганы хуралдаанд оролцохгүй байхыг тогтсугай.

Үндсэн хуулийн хямралд хүргэсэн, түүнээс гарах улс төрийн болон нийгмийн  тогтворгүй байдал үр дагаврыг энэхүү байдлыг санаатайгаар бий болгосон МАН бүрэн хариуцахыг сануулсугай гэх тогтоол, бүлгийн шийдвэрийг АН-ын бүлгийн гишүүдийн шийдвэр гарсан.

УИХ-ын даргын зөвлөл хуралдах ёстой. УИХ-ын даргын зөвлөлд Ардчилсан нам орж танилцуулна. Нэг үгээр тов дараалалд оруулах ёстой. Мөн хоёуланг нь хэлэлцэх ёстой. АН-ын бүлэг төрийн хоёр өндөр албан тушаалтыг огцруулах  асуудлыг хоёуланг нь зэрэг санал өгөх ёстой гэдэг шийдвэрийг гаргасан. Энэ шийдвэр АН-ын бүлгийн онцгой шийдвэр. Бид нар аливаа асуудлыг 2/3 дээшээ шийдвэл бүлгийн гишүүд энэ шийдвэр, саналыг бүрэн дүүрэн дагах ёстой. Өөр  байр суурь илэрхийлэх ёсгүй гэж намын дүрэм, бүлгийн дүрэмд байдаг. Энэ шийдвэрийг бүлгийн гишүүд 100 хувь дагаж биелүүлэх ёстой. Хэрвээ 100 хувь дагаж биелүүлээгүй тохиолдолд АН эдгээр гишүүдэд улс төрийн хариуцлага хүлээлгэх, улс төрийн дэмжлэг үзүүлэхгүй байх, дүрмийн болон боломжит бололцоонууд бүрэн тусгагдсан байдгийг хэлье" гэлээ.

"УИХ-ЫН ДАРГА, ЕРӨНХИЙ САЙДЫН АСУУДЛЫГ ЗЭРЭГ ХЭЛЭЛЦЭЖ, ӨНӨӨДӨР ШИЙДЭХ ЁСТОЙ"

Ардчилсан нам дарга О.Цогтгэрэл тэргүүтэй гишүүд өнөөдөр /2025.10.16/ мэдээлэл хийлээ.

Тэрбээр "Монгол Улс эмх замбараагүй байдал, Үндсэн хуулийн хямралын босгон дээр зогсч байна. Асуудал цагаар тоологдож эхэлж байна. Энэ хаанаас эхлээд ийм нөхцөл байдал үүсгэчихэв ээ. Төрөө хямралаас гаргаж, түмнээ ядуурлаас аварна гэдэг улс төрийн хүчин завсаргүй засагласаар олон жил боллоо. Өнөөдөр төрийн хямрал, түмний ядуурал улам даамжирлаа. Олон жил засагласан улс төрийн хүчин хулгайгаа нууж, хаалганы ард хэлцэлдэж явахаар ийм зүйл болдог юм байна. Загас толгойноосоо эхэлж өтдөг гэдгийн үлгэр яг энд биелж байна. Өнөөдөр Монгол Улсын багш, эмч нар нь жагсч, эрчим хүчний салбар нь лаа барихдаа тулчихсан байхад энэ бүхэн эрх баригчдад огт хамаагүй юм байна. Зөвхөн албан тушаалын хэнээрхэл энэ түвшинд очиж байна. Одоо яах ёстой вэ. Ардчилсан намаас зарчмын байр суурь илэрхийлж, хүлээцтэй байж ирсэн.

Үүний цаана парламентын засаглалын асуудал яригдахыг үгүйсгэхгүй. Бид сүүлдээ энэ зүйл рүү санаатай хөтөлж байна гэж үзэхээс өөр аргагүй байдалд хүрч байна. Энэ ажлыг санаатайгаар зохион байгуулж, зурж, түлхэж байгаа хэсэг бүлэг хүмүүс байна уу гэж харж байна.

УИХ-ын чуулган эхлэх ёстой. Чуулганаас завсарлага авч Ардчилсан намын бүлэг хуралдана. Бүлгийн шийдвэрийг гаргах ёстой. Өмнөх хурлын шийдвэрээр УИХ-ын даргыг огцруулах асуудлыг яаралтай оруулж, энэ хоёр хүний асуудлыг хамтад нь хэлэлцэх ёстой гэдэг шаардлага тавьж, үүнийгээ нэхэж байна. Мөн АН-ын бүлгийн гишүүдийг УИХ-ын дарга болон Ерөнхий сайдыг огцруулах асуудлыг олонхын саналаар шийдэж, улс орноо хямралаас гаргах ёстой гэдэг саналаа танилцуулна. Хэрвээ нэг хүний асуудал нь орж ирэхгүй бол АН-ын бүлэг чуулганд оролцохгүй, гарах үр дагаврыг эрх баригчид бүрэн дүүрэн хариуцах ёстой. Бид УИХ-ын даргад шаардлагаа тавьж, УИХ-ын даргын зөвлөлийг нэн яаралтай хуралдуулж, өнөөдрийн чуулганы хэлэлцэх асуудлын дараалалд УИХ-ын даргыг огцруулах асуудлыг оруулж, өнөөдөртөө шийдэж дуусах ёстой гэдгээ мэдэгдэж байна" гэв.