УИХ-ын дарга Д.Амарбаясгалан чөлөөлөгдөх хүсэлт гарган нэр холбогдоод буй асуудлаараа хуулийн байгууллагад шалгуулах болно гэдгээ мэдэгдлээ. Үүнтэй холбоотойгоор ТББХ 17.00 цагаас дахин хуралдаж эхэллээ. Байнгын хорооны 23 гишүүнээс 23 гишүүн бүгд дэмжиж, санал хураалт явууллаа. 

ТББХ-ны дарга Ц.Сандаг-Очир:

-Хэлэлцэж байгаа асуудалтай холбоотойгоор гишүүд үг хэлж дууслаа. Одоо хэлэлцэж буй асуудалтай холбоотойгоор санал хураалт явуулна. ТББХ 68.8 хувийн ирцтэй байна. Ерөнхий сайд Г.Занданшатарын огцруулах саналыг дэмжье гэсэн саналын томьёоллоор санал хураана. 

Санал хураалтад нийт 22 гишүүн оролцсоноос нийт гишүүдийн 86.4 хувийн саналаар санал дэмжигдсэнгүй. 

Тодруулбал Ерөнхий сайдыг огцруулах саналыг УИХ-ын гишүүн Л.Гантөмөр, Ч.Лодойсамбуу, Э.Одбаяр нарын гурван гишүүн дэмжиж, бусад буюу УИХ-ын дарга Д.Амарбаясгалан, А.Ариунзаяа, М.Бадамсүрэн, Ж.Бат-Эрдэнэ, Б.Баярбаатар, Э.Болормаа, С.Бямбацогт, Ц.Даваасүрэн, С.Зулпхар, Ц.Идэрбат, Л.Мөнхбаатар, Ч.Номин, Н.Номтойбаяр, Л.Оюун-Эрдэнэ, Ц.Сандаг-Очир, О.Саранчулуун, Ц.Туваан, Г.Уянгахишиг, Б.Хэрлэн нар дэмжээгүй санал өглөө.

Ингэснээр өнөөдрийн ТББХ-ны хуралдаан өндөрлөлөө. 

ТББХ-ны хуралдаанд одоогоор 20 гишүүн оролцож байна. Гишүүд урьдчилан ирүүлсэн нэрсийн дагуу үг хэлж байна. 

 

ЗГХЭГ-ын дарга С.Бямбацогт:

 

-УИХ-ын гишүүд Үндсэн хуулийн заалтаа санахгүй байх шиг байна. Бид уг нь хуулиар хүлээсэн үүрэгтэй хүмүүс шүү дээ. Засгийн газар өдөр тутамдаа энэ өвөл яаж гал алдахгүй байх уу гэдэг дээр санаа зовнин ажиллаж байна. Гэтэл бид есдүгээр сарын 01-нд өргөн барьсан төсвөө 45 хоног хэлэлцсэнгүй.

Олон нийтийн жигшээд байгаа нүүрсний хулгайн хэргийг нэг тийш шийдье гэхээр ярьдаггүй. Тэгсэн хэр нь нэг хүний, нэг бүлэглэлийн, нэг намын эрх ашгийг эрхэмлээд байгаа юм уу?

Нийт улсын эрх ашиг яасан бэ? Айл гэр болж тоглодог газар биш шүү дээ. Улсаараа тоглож ханалаа. Төр, улсаа бодъё л доо. Үүнийгээ санадаг, мэддэг баймаар байна. Дөнгөж 100 хонож байгаа Засгийн газраа огцруулъя гээд сууж байж болохгүй. Харин яаж дэмжиж, хамтарч ажиллах уу, төрийн хуулийг дээдлэх үү гэж бодох ёстой шүү. Засгийн газрыг огцруулах асуудал байнга хууль зөрчиж байгаа. Ингэж хүч түрэх юм бол Монгол Улсад хууль байх хэрэгтэй юу уу? Арай хэтрээд байгаа юм биш үү? Намын бүлэг нь хүртэл ойлголцоод хуралдаж чадахгүй байна. 

 

УИХ-ын гишүүн М.Энхцэцэг: 

 

-Ардчилал ямар хэрэгтэй вэ гэдгийг ухааруулсан өдрүүд болж өнгөрлөө. Хууль хүчний байгууллагуудыг яаж увайгүйгээр улс төрийн зорилгоор ашиглаж болдог гэдгийг харуулсан өдрүүд байлаа гэж бодож байна. Хэдхэн хүн энхийн цагаан тагтаа бусад нь бүгд нүүрсний хулгайчид болж гүтгүүллээ. Ямар ч баримт нотолгоогүй мэдээнд үндэслэн төрийн гурван өндөрлөгийн нэгээ гүтгээд, ажлыг нь хийлгэхгүй, ажлаа өг гэж шаардаж байна. 

УИХ, Засгийн газрын гишүүдийг турхирч байна. 

Тиймээс Ерөнхий сайдыг үүнд хариуцлага хүлээх ёстой гэж үзэж байна. 

 

УИХ-ын гишүүн Д.Батлут:

 

-Сүүлийн өдрүүдэд ч бид ёстой булайгаа дэлгэж байх шиг байна. Өнгөн дээрээ шударга царайлсан нөхрүүдийн хийсэн хууль бус үйлдлүүдийн баримт нь гараад ирчихлээ. Одоо тэгээд Оюутолгой төслийг сайжруулъя, ард түмэндээ ашиг хүртээе гэж яаж хэлж, ярьж чадах юм бэ? За яах вэ та нар энэ байнгын хорооны танхимд олонх болж болно. Харин их хурлын танхимд ард түмэн олонх шүү.