Ж.Бат-Эрдэнэ

УИХ-ын гишүүн

-МАН-ын бүлэг өнөөдөр /2025.10.15/ 12.00 цагаас хуралдах ёстой байсан. Бид өчигдөр 11.00 цагийн үед бүлгийн хурлаа зарласан. УИХ-ын гишүүн У.Отгонбаяр нарын нэр бүхий гишүүд тодорхой хугацаагаа бүлгийн хурлаа хийсэнгүй, МАН-ын бүлгийн хурлаа хийе, намын бүлгийн дүрэмд заасны дагуу нийт гишүүдийн олонх нь хүсэлт гаргасан тохиолдолд гээд хүсэлт гаргасан. Бид хүсэлтийг нь хүлээн авч өнөөдөр хурлаа зарласан байсан. Хурлаар улс төрийн нөхцөл байдал, улсын төсөвтэй холбоотой асуудлыг хэлэлцэнэ гэсэн. Гэтэл 14.00 цагийн орчимд хурал зарлаж, тодорхой гишүүд хуралдсан байсан. Намын бүлгийн дүрэмд заасны дагуу бүлгийн дарга хурлыг товлодог. Энэ дүрмийг бид саяхан шинэчилсэн. Гэтэл нөхдүүд бүлгийн хурал хийнэ лээ.

Нэгд, энэ хурал дүрмийн бус хурал болж байна. Ингэснээр МАН-ын бүлгийг албан ёсоор хоёр хувааж байна шүү гэдгийг хэлсэн. Бид өмнө нь 30, 32 гэсэн гишүүнтэй хоёр бүлэг долоон жилийн өмнө болж байсан.

Тэр үед миний бие байсан. Тэндээс бид намын удирдлагууд энэ хагарлаас дандаа урьдчилан сэргийлж байх ёстой юм байна гэдэг сургамжийг авсан. Тийм болохоор хоорондоо урьдчилан ярилцаж байх ёстой. Тэр утгаараа миний бие энэ асуудлаас сэргийлж, МАН-ын бүлгийн асуудлыг хойш тавьсан. Хэрвээ бүлгээ хуралдуулсан бол хоосон хэрүүл болох байсан. МАН-ын бүлгийн дарга эв нэгдлийг хангах ёстой. Нам дотроо эвтэй байж, мөрийн хөтөлбөрөө хэрэгжүүлэх ёстой.

Ж.Батжаргал

УИХ-ын гишүүн

-МАН хоёр хуваагдаагүй ээ. Бид нэг бүлэг. Тийм учраас асуудлаа хооронд ярьж, хууль дүрмийнхээ хүрээнд шийдсэн асуудлаа дээдэлж явах ёстой. 

2025 оны аравдугаар сарын 15-ны өдөр УИХ дахь МАН-ын бүлгийн ээлжит бус хуралдаан боллоо. Хуралдаанаар хоёр асуудал хэлэлцлээ. Нэгд, МАН-ын бүлгийн даргыг сонгох асуудлыг хэлэлцэж, хуралдаанд оролцсон гишүүдийн дийлэнхийн саналаар шинэ даргаар намайг сонголоо. Хоёрт, МАН-ын бүлэг дээр ажлын хэсэг байгуулах тухай хэлэлцэж, шийдвэрлэлээ. Учир нь Засгийн газраас УИХ-д 2025 оны есдүгээр сарын 1-нд Монгол Улсын 2026 оны нэгдсэн төсөв, түүнийг дагасан хууль тогтоомжуудыг өргөн мэдүүлсэн. Өнөөдөр 2025 оны аравдугаар сарын 15-ны өдөр. Хуулиараа бид ирэх оны төсвөө арваннэгдүгээр сарын 15-ны дотор баталдаг. УИХ-ын үндсэн бүтэц болсон байнгын хороодоор улсын төсвийг хэлэлцэж байгаа ч хууль тогтоомжуудад болон 2026 оны Хөгжлийн төлөвлөгөөнд нийцсэн эсэх талаарх санал хураалтыг хийгээгүй байна. Тийм учраас улсын төсвийг хэлэлцүүлэгт бэлтгэх бүлгийн ажлын хэсгийг байгуулах нь зүйтэй юм байна гэж үзлээ.