Хятад улсын иргэдийг 15 хүртэлх хоногийн хугацаанд визгүй зорчуулах хөтөлбөртэй холбоотойгоор өмнөд солонгосчууд эсэргүүцлийн жагсаал өрнүүлж эхэлсэн билээ. Өмнөд Солонгосын жагсагчид өнгөрсөн хугацаанд "Хятадыг зайлуул", "Коммунизмыг устга" гэх мэт уриа лоозон барьж жагссан бөгөөд зарим нь Хятадын дарга Ши Жиньпиний зурагтай далбааг урж, шатаажээ.

Тэгвэл үймээн бужигнаантай энэ өдрүүдэд "Би тайвань хүн" гэсэн бичигтэй энгэрийн тэмдэг трэнд болоод байна.

Тайванийн нэгэн иргэн өнгөрсөн долоо хоногт цахим сүлжээндээ "Өмнөд Солонгост сүүлийн үед хятадуудыг эсэргүүцсэн хөдөлгөөн өрнөөд байгаа бололтой. Би энэ тэмдгийг зүүдэг юм бил үү?" гэж бичээд, тэмдэгнийхээ зургийг хавсаргажээ. Тус тэмдэг дээр Тайванийн туг болон "Би Тайваниас ирсэн", "Би тайвань хүн" гэсэн үгсийг англи, солонгос хэлээр бичсэн байв.

Энэ бичвэрийн сэтгэгдэл хэсэгт хүмүүс "Гаднаас чинь хараад ялгахад хэцүү учир наадах чинь үр дүнтэй арга байна", "Ийм тэмдэг хүртэл хэрэг болох цаг ирэх гэж, ичмээр юм даа", "Би хятад хүн. Би ийм тэмдэг зүүчихвэл аюулгүй байж чадах болов уу?" гэх зэргээр бичжээ.

Өмнөд Солонгост өнгөрсөн дөрөвдүгээр сард 20 гаруй насны хоёр хятад эмэгтэй халдлагад өртсөн тохиолдол гарсан. Тухайн эмэгтэйчүүд автобус дотор мандарин хэлээр ярьж явсанд эгдүүцсэн 30 настай эрэгтэй тэдэнд халдсан аж. Энэ явдлаас таван өдрийн дараа нэгэн тайвань эрийг хятад хүн гэж андуурч, толгой руу нь сөжүний шилээр цохисон хэрэг гарчээ.

Үндэсний ашиг сонирхолтой зөрчилдөж буй энэ мэт үйлдлээ зогсоохыг ерөнхийлөгч Ли Жэ Мён саяхан уриалсан билээ.

Дашрамд дурдахад, наймдугаар сарын байдлаар Өмнөд Солонгост аялсан гурван жуулчин тутмын нэг нь хятад байжээ. Энэ сард хятад жуулчдын хэмжээ 605 мянга хүрээд байна. Энэ нь нэгдүгээр сард 364 мянга байснаас 1.7 дахин өссөн үзүүлэлт юм.