Нийслэлийн Засаг дарга бөгөөд Улаанбаатар хотын Захирагч Х.Нямбаатар өвөлжилтийн бэлтгэл ажил болон бусад цаг үеийн асуудлаар мэдээлэл өглөө.

Агаарын чанар сайжирч байна

Тэрбээр, агаарын бохирдлын үзүүлэлтийг өмнөх оны мөн үетэй харьцуулан танилцуулж, “Өнгөрсөн оны аравдугаар сарын агаарын чанартай өнөөдрийн мэдээг харьцуулахад, PM2.5 тоосонцор 1.8 дахин, PM10 тоосонцор 1.6 дахин буурсан байна. Гэхдээ агаарын бохирдлын оргил үе болох арванхоёрдугаар сар ойртож буй тул бид өдөр өдрөөр нь харьцуулж шинжилгээ хийх төлөвлөгөөтэй ажиллаж байна” гэв.

Мөн өвөлжилтийн бэлтгэл хангах хүрээнд боловсрол, эрүүл мэндийн салбарын байгууллагуудад шаардлагатай урсгал засвар, халаалтын зуухны шинэчлэл зэрэг ажлыг Нийслэлийн Засаг даргын нөөц хөрөнгөөр гүйцэтгэсэн бөгөөд одоогоор ноцтой хүндрэл гарсан газар байхгүй гэдгийг онцлов.

Зам засварын зарим ажил хугацаандаа амжихгүй байна

Зам засварын ажилтай холбоотойгоор Хотын дарга Х.Нямбаатар, “Зам гэдэг зүгээр шороо тэгшлээд асфальт тавьдаг ажил биш. Доорх шугам сүлжээ, инженерийн дэд бүтцийн ажлуудтай уялддаг учраас зарим зам засвар хугацаандаа дуусах боломжгүй байгаа" гэлээ. Гэмтлийн эмнэлгийн баруун талд баригдаж буй гүүрэн байгууламж дулааны шугамын өргөтгөлтэй уялдан ажиллаж байгаа бөгөөд арваннэгдүгээр сарын дотор ашиглалтад оруулахаар төлөвлөжээ. Энэ онд Улаанбаатар хотод нийт 109 км авто зам шинэчилсэн бол ирэх онд хэд хэдэн томоохон төслийг хэрэгжүүлэхээр төлөвлөж байгаа гэв.

Түүнчлэн Сүхбаатар дүүргийн НИТХ-ын төлөөлөгчийн гэр бүлийн хүчирхийллийн асуудалтай холбоотой мэдээлэлд Засаг дарга Х.Нямбаатар тайлбар өгч, “Тухайн албан тушаалтан Нийслэлийн Засаг даргын Тамгын газарт харьяалагддаггүй. Мөн гэм буруутай эсэхийг хууль, шүүхийн байгууллага тогтооно. Шүүхийн шийдвэр гарахаас өмнө тухайн хүнийг үүрэгт ажлаас нь чөлөөлөх үндэслэл байхгүй. Хэрэв гэм буруутай нь тогтоогдвол хариуцлагын асуудал яригдана” гэв.

Түлшний хүрэлцээ хангалттай, иргэдийг төөрөгдүүлж байна

Түлшний цэг хүрэлцэхгүй байгаа тухай гомдлын талаар тэрбээр “Иргэд түлшний цэг олдохгүй байна гэх мэдээлэл худал. Одоогоор 400 орчим цэг хэвийн ажиллаж байна. Харин ийм худал мэдээллийг нүүрсний борлуулалтаас хасагдсан зарим хүмүүс тарааж байгаа болов уу гэж үзэж байна. Одоо түлш борлуулж буй ажилчид ‘Тавантолгой түлш’ ХХК-ийн гэрээт ажилтнууд болж, тогтмол цалинтай ажиллаж эхэлсэн” хэмээн мэдэгдэв.

Мөн утааг бууруулах ажлын хүрээнд энэ жил 5000 айлыг төвлөрсөн хийн хэрэглээнд шилжүүлж байгаа бөгөөд арваннэгдүгээр сарын 15-наас эхлэн Гандан орчмын айлуудад гал түлүүлэхгүй болох аж. Ирэх жил дахин 50000 айлыг хийн халаалтад холбохоор зорьж буйг онцолсон юм.