НЭМЭЛТ: 

УИХ дахь МАН-ын бүлгийн ээлжит бус хуралдаанаас мөн багш, эмч нарын цалинг боломжит хэмжээнд нэмэх шийдэл гаргах нь зүйтэй хэмээн үзсэн байна.

УИХ-ын гишүүн Д.Үүрийнтуяа  “Засгийн газраас Монгол Улсын 2026 оны төсвийн хуулийн төслийг өргөн бариад 45 хоносон.  УИХ дээр төсвийн хоёр дахь хэлэлцүүлэг үргэлжилж байна. УИХ-аас төсвийн хуулийг чамбайруулах ажлын хэсэг гаргаж ажиллах, мөн эмч, багш нарын цалинг нэмэгдүүлэх эх үүсвэрийг гаргахын тулд төсвөөс хэмнэж болох зардлын тооцооллыг гаргах шаардлагатай. Мөн тэтгэврийг инфляцитай уялдуулж 8.6 хувиар нэмэгдүүлэх боломжийг эрэлхийлэх нь зүйтэй гэж үзлээ” гэв.

УИХ-ын гишүүн Х.Ганхуяг "Засгийн газар тэвчиж болох зардлуудыг танаж, багш нарын цалинг 20 хувь, эмчийн цалинг 10-15 хувь, ахмадуудын тэтгэврийг 8.5 хувиар нэмэгдүүлэх зарчмын шийдвэрт хүрлээ" гэсэн юм.

Ж.Бат-Эрдэнийг УИХ дахь МАН-ын бүлгийн даргаас чөлөөллөө

УИХ дахь МАН-ын бүлгийн өнөөдрийн ээлжит бус хуралдаанаас гаргасан шийдвэрийн талаар энэ цаг мөчид танилцуулж байна. УИХ дахь МАН-ын бүлгийн дэд дарга У.Отгонбаярын өгсөн мэдээллээр УИХ-ын гишүүн Ж.Бат-Эрдэнийг УИХ дахь МАН-ын бүлгийн даргаас чөлөөлсөн байна. Түүнийг бүлгийн гишүүдийнхээ дунд эв нэгдэл хангаж ажиллаж чадаагүй гэсэн үндэслэлээр чөлөөлжээ. УИХ-ын гишүүн Н.Наранбаатар тэргүүтэй 38 гишүүн Ж.Бат-Эрдэнийг бүлгийн даргаас чөлөөлөх шийдвэр гаргасныг ийнхүү дэмжиж шийдвэрлэжээ.

Дараагийн бүлгийн дарга тодортол УИХ-ын гишүүн У.Отгонбаяр бүлгээ удирдах аж.

МАН-ын бүлэг эмч, багш нарын цалинг нэмэх асуудлаар хуралдаж байна

НЭМЭЛТ: 

УИХ дахь МАН-ын бүлгийн өнөөдрийн хуралдааныг дэд дарга нь удирдаж байгаа бөгөөд бүлгийн дарга Ж.Бат-Эрдэнэ нь оролцоогүй аж. Түүнтэй хамт УИХ-ын дарга Д.Амарбаясгалан нарыг дэмжигчид бүлгийнхээ хуралд оролцоогүй гэх мэдээлэл байна. Энэ удаагийн бүлгийн хуралд нийт 38 гишүүн оролцож буй аж.

УИХ дахь МАН-ын бүлгийн хуралдааны дэгд зааснаар бүлгийн дэд дарга нь хуралдаан зарлаж, удирдах боломжтой байхаар зохицуулжээ.

УИХ дахь МАН-ын бүлгийн дэд даргаар УИХ-ын гишүүн Ж.Алдаржавхлан, А.Ариунзаяа, Э.Болормаа, У.Отгонбаяр нар ажилладаг. УИХ-ын гишүүн Н.Наранбаатар өнөөдөр сэтгүүлчдэд мэдээлэл хийх үеэрээ "УИХ дахь МАН-ын бүлэг дөрвөн дэд даргатай, тэднээс нэг нь бүлгийн хуралдааныг удирдах боломжтой. Бүлгийн хурлыг намын дарга, бүлгийн гишүүдийн олонхи шаардсан бол хуралдуулах боломжтой. Бүлгийн гишүүдийн олонхи буюу 38 гишүүн шаардлага тавилаа. Бүлэг сүүлийн хоёр долоо хоног хуралдсангүй. Улс орны өмнө тулгамдсан олон асуудал хуримтлагдлаа. Бүлэг хуралдаж улс төрийн шийдвэрээ гаргах зайлшгүй шаардлага үүссэн. Аравдугаар арын 9-нд бид цөөхүүлээ бүлгийн даргад бүлгийн хурлыг зарлах шаардлага тавьсан.  Мөн гишүүд бүлгийнхээ групп дээр бүлгээ хуралдуулж, улс орны өминө тулгамдсан асуудлаа хэлэлцье гэтэл хурал зарлаагүй,  хүлээлгээд байгаа.  Цаг хугацаа бага байна, баруун аймгууд гантай байсан. Зуд болох эрсдэл өндөр байна. Төсөв хэллэцэх шаардлага байна. Багш, эмч нар цалингаа нэмүүлэх шаардлага тавьж, жагссан. Засгийн газрыг огцруулах шаардлага, УИХ-ын даргыг огцруулах шаардлага өргөн барьсан байгаа тул хэлэлцэх асуудал их байна.  Төрийн ажил тасралтгүй явж байх ёстой тул байнгын хорооны хурлыг өнөөдөр 16:00 цагт дуусангуут үргэлжлүүлээд бүлгийг хуралдах боломжтой" гэж мэдээлэл өгсөн.

Харин УИХ дахь МАН-ын бүлгийн дарга Ж.Бат-Эрдэнэ "Бүлгийн хуралдааныг маргааш /2025.10.15/ 12:00 цагт зарласан. Эвлэрэх ажлыг өнөөдрийг хүртэл хийгээд явж байна. Ерөнхийлөгчтэй зөвшилцсөн. Цаашаа ийм байдлаар явбал төрийн ажил зогсох гээд байна. Хоёр тал огцруулах бичгээ татаж аваасай гэдэг санал хүргүүлээд явж байна. Хамгийн том нам нь улс төрийн тогтворгүй байдал руу орсон тул Ерөнхийлөгчтэй мэдээлэл солилцолгүй яах вэ дээ. УИХ-ын дарга, Ерөнхий сайд учраа олоогүй байхад бүлгийн хурал зарлавал хэрүүл л болно. Тийм учраас бүлгийн хуралдааныг хэрүүл болгохгүйн тулд маргааш 12:00 цагт зарлаад байна” гэж мэдэгдсэн юм.

МАН-ын бүлэг эмч, багш нарын цалинг нэмэх асуудлаар хуралдаж байна

УИХ дахь МАН-ын бүлэг яг одоо эмч, багш нарын цалинг нэмэх асуудлаар хуралдаж байна. Сүүлийн хоёр долоо хоног тус бүлэг хуралдаагүйгээс асуудал овоорч, хугацаа алдалгүй шийдвэрлэх шаардлага үүссэн тухай УИХ-ын гишүүн Н.Наранбаатар нар мэдэгдсэн. Тиймээс ч өнөөдөр 16:00 цагийн орчимд бүлгийг хуралдуулах шаардлагыг нэр бүхий 38 гишүүн гаргаж, УИХ дахь МАН-ын бүлгийн даргад тавьсан болохоо мэдэгдсэн. Тэгвэл тус бүлэг ажил хаялт зарлахаа мэдэгдээд байгаа багш нарын цалингийн асуудлыг хэлэлцэж эхэлсэн нь энэ аж.

Мөн эмч нар цалингаа нэмүүлэх шаардлагыг тавьж, Сүхбаатарын талбайд тайван жагсаал хийсэн. Иймээс нэн тэргүүнд дээрх салбарынхны цалинг нэмэх асуудлыг шийдвэрлэх нь зүйтэй гэж үзсэн бололтой. УИХ Монгол Улсын 2026 оны төсвийн төсөл болон холбогдох бусад хуулийн төслүүдийг хэлэлцэж байна. Төсвийн хоёр дахь хэлэлцүүлгийг хийж байгаа үед цалингийн нэмэгдлийг шийдвэрлэхгүй бол дараагийн гурав дахь хэлэлцүүлгээр шийдвэрлэх боломж байхгүй. Иймээс энэ үе хамгийн алдаж болохгүй үе юм.

Энэ удаагийн УИХ дахь МАН-ын бүлгийн хуралдаанд Ерөнхий сайд Г.Занданшатар оролцож байна. Тэрбээр өмнө нь эмч, багш нарын төлөөллийг хүлээн авч уулзаж цалин хөлс нэмэгдүүлэх асуудлаар санал солилцож, Сангийн яаманд энэ асуудлыг судалж оруулж ирэх үүрэг өгч байсан билээ.