УИХ-ын гишүүн С.Эрдэнэболдоос Монгол Улсын Ерөнхий аудиторт хандан Төрийн санхүү, төсвийн хараат бус хяналтын хэрэгжилтийн талаар асуулт тавьсан.  Уг асуултын хариултыг өнөөдөр /2025.10.14/Төсвийн байнгын  хорооны хуралдаанаар хэлэлцлээ.  Монгол Улсын  Ерөнхий аудитор С.Магнайсүрэн  холбогдох  танилцуулга, мэдээллийг хийсэн юм.

Төрийн аудитын үндсэн зорилт нь төрийн санхүү, төсөв, нийтийн өмчийг хууль ёсны дагуу арвилан хэмнэлттэй, үр ашигтай, үр нөлөөтэйгөөр төлөвлөх, хуваарилах, ашиглах, зарцуулахад хяналт тавих, түүнчлэн төрийн санхүүгийн удирдлагыг сайжруулж, эдийн засгийн тогтвортой хөгжлийг хангахад дэмжлэг үзүүлэхэд чиглэдэг.

Энэхүү зорилтын хүрээнд Төрийн аудитын байгууллага улсын хэмжээнд санхүүгийн тайлангийн аудитад 6800, гүйцэтгэл, нийцлийн аудитад 7100 (давхардсан тоогоор) гаруй байгууллагыг хамруулан аудит хийж байна.

Монгол Улсын Ерөнхий аудитор мэдээлэлдээ аудитын шийдвэрийг хэрэгжүүлэхэд хууль, эрх  зүйн орчны тодорхойгүй байдал,  төрийн аудитын байгууллагын  эдийн засгийн баталгааны талаар  онцолсон юм.

Мөн Засгийн газраас Улсын Их Хуралд өргөн мэдүүлсэн Монгол Улсын жилийн төсвийн төсөлд орлого нэмэгдүүлэх, зарлагыг бууруулах, төсвийн санхүүжилтийн үр ашгийг дээшлүүлэх талаар өгсөн дүгнэлт, саналын хэрэгжилт, түүний учир шалтгаан, үр дагаврын талаар өсвийн байнгын хорооны  гишүүдэд мэдээллээ. Эцэст нь улсын нэгдсэн төсөв дэх хөрөнгө оруулалтын төсөл, хөтөлбөр, арга хэмжээ, худалдан авах ажиллагаа, гадаад зээл, тусламж, хандив, санхүүгийн дэмжлэгийн төлөвлөлт, гүйцэтгэл, ашиглалт, зарцуулалт, хэрэгжилт, тайлагнал дахь нийтлэг алдаа, тэдгээрийг дахин давтахгүй байх үүднээс хэрэгжүүлэх арга хэмжээний талаар  танилцуулж, гишүүдийн асуултад хариулсан юм.