ОХУ-ын Дотоод хэргийн яам Кремлийг шүүмжлэгч Владимир Кара-Мурзаг дахин баривчлах тушаал гаргалаа. Гэхдээ түүнд ямар ял тулгасан нь тодорхойгүй байна.

44 настай Кара-Мурза эх орноосоо урвасан болон бусад хэргээр 25 жилийн хорих ял эдэлж байсан. Түүнийг өнгөрсөн зун ОХУ болон барууны хооронд хүйтэн дайнаас хойш хийсэн хамгийн томоохон хэмжээний хоригдол солилцоогоор суллаад байсан билээ.

Оросын хууль тогтоогчид наймдугаар сард эхээр Берлинд дайны эсрэг жагсаал зохион байгуулсан Кара-Мурза болон сөрөг хүчний удирдагч Алексей Навальныйн бэлэвсэн эхнэр Юлия Навальная, Илья Яшин нарыг терроризм, экстремизм гэсэн үндэслэлээр яллахаа мэдэгдсэн. Мөн Кара-Мурза, Илья Яшин нарыг Даваа гаригт террористуудын жагсаалтад оруулсан байна.

Вашингтон дахь ОХУ-ын Элчин сайдын яам Кара-Мурзад шинэ паспорт олгохоос татгалзсаныг тэр шүүмжилж байв. Үүнийг эсэргүүцэгчдийг иргэний харьяаллаас хасдаг Зөвлөлтийн жишиг сэргэж байна гэж тэр зүйрлэжээ.

Кара-Мурзаг сөрөг хүчний удирдагч Алексей Навальныйн залгамжлагч ч гэж нэрлэдэг. Тэрбээр Сибирийн хорих ангиас эхлэн 13 өөр шоронд хоригдож байсан бөгөөд Осмкийн шоронд 11 сарын турш ганцаарчлан хоригдож байжээ. Түүний аав нь Леонид Брежневийг илт шүүмжлэгч, Борис Ельциний үеийн шинэчлэлийг дэмжигч, сэтгүүлч, телевизийн хөтлөгч Владимир Алексеевич Кара-Мурза юм.