Хойд Солонгос улс хилийн шугамынхаа дагуу танк эсэргүүцэгч хаалт барьжээ. Энэ нь Өмнөд Солонгостой харилцаагаа таслах гэсэн Умардын хүчин чармайлтын тод илрэл болж байна.

Өмнөд Солонгосын Ардын хүч намын төлөөлөгч Ю Ён Воны хэлснээр Умардын тал дөрвөн багц хаалт барьсан бөгөөд тус бүр 2.5 км урттай. Хиймэл дагуулын зураг болон Өмнөдийн Штабын дарга нарын нэгдсэн хорооны нийлүүлсэн мэдээлэлд үндэслэн үүнийг тооцоолжээ. Хаалтуудын өндөр нь 4-5 метр бөгөөд урд зүг рүү харсан талдаа хоёр метр өргөн бетон хана, нөгөө талдаа шороон овоолгоор бэхлэгдсэн байна.

Танк эсэргүүцэгч хаалт нь хоёр улсын дайсагнасан харилцааг илтгэх бэлгэдлийн чанартай зүйл юм. Хойд Солонгосын удирдагч Ким Жон Ун 2023 оны арванхоёрдугаар сард хоёр улсын харилцааг дайсагнасан гэж тодорхойлоод, эвлэрлийг илэрхийлэхгүй гэдгээ мэдэгдсэн билээ. Энэ мэдэгдлээс хойш Пёньян хилийн цэрэггүй бүсэд мина байршуулах, өргөст тор татах зэрэг арга хэмжээ авчээ.