Мексикт өнгөрсөн долоо хоногт орсон аадар борооны улмаас амь үрэгдэгсдийн тоо 64 болж өссөн талаар албаныхан Даваа гаригт (2025.10.13) мэдэгдэв. Хөрсний гулгалтаас болж хайгуулын ажил удаашралтай байгаа нь хохирогчдын тоо нэмэгдэхэд нөлөөлж байгаа аж. Төв болон зүүн өмнөд хэсэгт үргэлжилсэн хүчтэй бороо орсны улмаас хөрсний гулгалт болж, гол мөрөн үерлэсэн. Иргэний хамгаалалтын зохицуулагч Лаура Веласкес Алзуагийн мэдэгдсэнээр 65 хүн ор сураггүй алга болжээ.

Мөн орон нутгийн иргэдийг аюулгүй газар хүргэх, ор сураггүй алга бологсдыг эрэн хайх ажиллагаанд цэргийн албан хаагчдыг дайчилж байсан. Гэсэн хэдий ч аадар бороо орсон бүс нутгийн 80 автозам бүрэн хаагдсан нь тусламж хүргэх ажиллагаанд саад болжээ. Улмаар зарим автозам нээгдэх хүртэл цэргийн албан хаагчдыг илгээх ажлыг хэд хоногоор хойшлуулсан аж.

Клаудиа Шейнбаум хэвлэлийн хурлын үеэр "Хангалттай хоол хүнс, ус авч, хүргэхийн тулд олон тооны нислэг үйлдэх шаардлагатай болж байна" гэж хэлсэн байна.

Өдгөө аврах, эрэн хайх ажиллагаа эхэлсэн бөгөөд албан ёсны урьдчилсан тооцоогоор 100 мянган байшин үер, хөрсний нурангид өртсөн нь тогтоогдсон байна.

Нийт таван муж хүчтэй аадар борооноос болж хохирол амссан бөгөөд засгийн газраас шуурхай арга хэмжээ авна гэж амласан. Мексикийн Иргэний хамгаалалтын агентлагийн мэдээлснээр, Даваа гаригийн (2025.10.13) өглөөний байдлаар ширүүн борооны улмаас Персийн булангийн эрэг дээрх Веракруз мужид 29 хүн, Мехико хотын хойд хэсэгт орших Хидалго мужид 21 хүн амиа алдсан байна. Мехико хотын зүүн хэсэгт орших Пуэбла хотод 13 хүн амиа алдсан бол төвийн Керетаро мужид нэг хүүхэд хөрсний гулгалтад өртөж нас барсан юм.