УИХ-ын Төрийн байгуулалтын байнгын хорооны хурлыг өнөөдөр 11:00 цагаас үргэлжлүүлж, Ерөнхий сайд Г.Занданшатарыг огцруулах тухай П.Сайнзориг нарын 54 гишүүний гаргасан саналыг хэлэлцэх ёстой байсан ч ирц бүрдээгүй шалтгаанаар тодорхойгүй хугацаагаар хойшлууллаа.

Тодруулбал, Төрийн байгуулалтын байнгын хорооны өнөөдрийн хуралдаанд харъяалагдах 32 гишүүнээс Ц.Даваасүрэн, С.Бямбацогт, Б.Хэрлэн, С.Зулпхар, М.Бадамсүрэн нар л ирэв. Харьяаллын бус гишүүнээс огцруулах санал гаргасан УИХ-ын гишүүн П.Сайнзориг, мөн Сангийн сайд Б.Жавхлан нар ирэв.

Уг байнгын хороонд харьяалалтай Н.Номтойбаяр, О.Алтангэрэл, Б.Батбаатар, О.Саранчулуун нар Ерөнхийлөгчийн айлчлалд багтан Энэтхэг улсыг зорьсон тул хүндэтгэн үзэх шалтгаантай гэж хэлж болно.

УИХ-ын Төрийн байгуулалтын байнгын хорооны хуралтай давхцан энэ цаг мөчид УИХ дахь Ардчилсан намын бүлэг хуралдаж, нууцад авсан нүүрсний оффтейк гэрээ хийгээд УИХ-ын даргыг огцруулах асуудалд ямар байр суурь баримтлах талаар ярилцаж байв. Иймээс тус бүлгийн гишүүд байнгын хорооны хуралд оролцож чадаагүй шалтгааныг харгалзан үзэж болох талтай.

УИХ дахь Ардчилсан намын бүлгийн гишүүдээс УИХ-ын Төрийн байгуулалтын байнгын хороонд Ж.Баярмаа, А.Ганбаатар, Э.Одбаяр, Б.Пүрэвдорж, О.Цогтгэрэл, Л.Гантөмөр, Д.Энхтуяа, Ч.Лодойсамбуу, Ц.Туваан, Ө.Шижир нар харьяалагддаг.

Харин ХҮН намаас Г.Уянгалянхуа, Т.Доржханд нар дээрх байнгын хороонд харьяалагддаг ч ирсэнгүй.

Мөн УИХ дахь МАН-ын бүлгийн гишүүд болох Л.Оюун-Эрдэнэ, А.Ариунзаяа, Ж.Бат-Эрдэнэ, Э.Болормаа, Ц.Идэрбат, Л.Мөнхбаатар, Ч.Номин, Л.Энх-Амгалан нар Төрийн байгуулалтын байнгын хорооны хуралд оролцоогүй нь ирцээр “бойкот” хийж хуралдааныг гацаах сонирхлоо гүйцэлдүүлэв үү гэж хэлж болохоор байгаа юм.

Ерөнхий сайдыг огцруулах асуудлыг Байнгын хороонд харьяалалтай таван гишүүн оролцож үргэлжлүүлэх нь оролцооны тухайд учир дутагдалтай. Учир нь тус байнгын хороо 32 гишүүнээс бүрддэг. Уг байнгын хорооны хурал нь өнгөрсөн Баасан гаригт /2025.10.10/ эхэлсэн тул өнөөдөр үргэлжлэх ёстой байсан. Энэ тохиолдолд гишүүдийн ирц хамаарахгүй хурал үргэлжлэх боломжтой байсан гэж Сангийн сайд Б.Жавхлан нар мэдэгдээд буй. Өөрөөр хэлбэл, Баасан гаригт эхэлсэн ирцээрээ хурал үргэлжлэх боломжтой бөгөөд санал хураасан нөхцөлд ирээгүй гишүүдийн ирц эсрэг гарна.

Нөгөө талдаа долоо хоног бүрийн Даваа гаригт 10:00 цагаас УИХ дахь Ардчилсан нам, МАН-ын бүлэг хуралддаг. Төрийн байгуулалтын байнгын хорооны хурлыг үдээс өмнөдөө зарлах нь бүлгийн хуралтай давхцаж ирцэд нөлөөлж болзошгүйг урьдчилан таамаглах ёстой байсан ч давхцуулсан нь санаатай үйлдэл байв уу гэж харж болох талтай.

Учир нь, УИХ дахь МАН-ын бүлэг 35, 33-аараа хуваагдан нэг хэсэг нь Засгийн газраа хамгаалж буй бол нөгөө хэсэг нь УИХ-ын даргыг хамгаалж байгаа. Зөрчилдөөнөөсөө болж өнгөрсөн долоо хоногт МАН-ын бүлэг хуралдаж чадаагүй. Гэхдээ УИХ-д 42 суудалтай Ардчилсан намын бүлэг, мөн бусад улс төрийн хүчнүүдээ үдээс өмнө хуралдаж энэ долоо хоногт хэлэлцэх асуудлаар байр сууриа нэгтгэхийг нь мэдсээр байж Ерөнхий сайдыг огцруулах асуудлыг өнөөдөр 11:00 цагаас үргэлжлүүлэн хэлэлцэхээр тов тогтоосон нь анхнаасаа үр дүн базаахгүй гарахыг тооцсон тооцоолол байв уу гэж харж болохоор буй.

УИХ-ын түүхэнд Ерөнхий сайдыг огцруулах асуудал ийн ирцээс болж хойшилж байсан удаагүй. Харин энэ удаад МАН-ын бүлгийн гишүүд өөрсдөө “бойкот” хийсэн нь тэр дундаа УИХ-ын дарга Д.Амарбаясгалан талд зогсож буй гишүүдийн хувьд хүссэн үр дүн нь гарахгүй гэж үзсэнээс ийн “бойкот” хийж, асуудлыг гацаав уу гэж хэлж болохоор байна.

УИХ-ын Төрийн байгуулалтын байнгын хорооны хуралдаан өнгөрсөн Баасан гаригт /2025.10.10/ эхэлж Ерөнхий сайд Г.Занданшатарыг огцруулах асуудлыг хэлэлцэж эхлэхэд УИХ-ын гишүүн Л.Оюун-Эрдэнэ оролцож, “Нүүрсний оффтейк гэрээгээ Г.Занданшатар дарга та өөрөө тайлбарла. Таныг Засгийн газрын хэрэг эрхлэх газрын дарга байх үед эхэлсэн асуудал” гэж хөндөж суусан. Харин Ерөнхий сайд Г.Занданшатарын хувьд “Нүүрсний оффтейк гэрээ надад хамаарахгүй асуудал” гэж сөрж суусан билээ.

Өнгөрсөн хоногуудын хамгийн халуун сэдэв болсон нүүрсний оффтейк гэрээ тойрсон асуудал дээр хариуцах эзэн олдохгүй ийн бие биерүүгээ чихсэн дуулианыг өнөөдөр үргэлжлүүлэн сонсч, халуун дээр нь асуудлыг мухарлахыг хүссэн хүн олосн байсан ч тодорхойгүй хугацаагаар хойшлогдоод байна.

Г.ХОРОЛ