Эстони улс Оростой хиллэдэг "Saatse Boot" гэх хэсгийн замын хөдөлгөөнийг түр хаажээ. "Saatse Boot" нь гутлын хэлбэртэй бөгөөд Эстонийн нутаг руу ороод гардаг Оросын газар юм. Эстоничууд уг хэсгээр зогсолтгүйгээр, зөвхөн дайран өнгөрөх байдлаар явж болдог. Яг тухайн хиллэдэг хэсэг нь км орчим үргэлжилдэг.

Гэвч орос цэргүүд хилийн орчимд байрших болсон тул Эстони улс тэр хэсгийн зорчих хөдөлгөөнийг хааж буйгаа Ням гаригт /2025.10.12/ мэдэгдлээ. ОХУ-ын нутаг дэвсгэрт ердийнхөөс илүү олон цэрэг ажиглагдсан тул ийм шийдвэр гаргажээ. Эстонийн хэвлэлд мэдээлснээр хилийн харуулууд эстоничуудын ашигладаг замын гол хэсэг рүү гарч зогсох нь ер бусын тохиолдол аж.

Дайны шууд заналхийлэл байхгүй ч гэлээ иргэдийн аюулгүй байдлыг бодолцон "Saatse Boot" хэсэгт зам хаасан байна. Хоёр улсын хил дээр нөхцөл байдал хурцдаж байна гэдэг бол хэтрүүлэгтэй мэдээлэл гэдгийг Ням гаригийн орой Эстонийн Гадаад хэргийн сайд Маргус Цахкна хэлжээ. Энэ үгээрээ тэр иргэдийн түгшүүрийг намжаахыг зорьсон бололтой.

Алсдаа "Saatse Boot" хэсгийн замыг хоёр улс хамтдаа ашиглахыг болиулах хэрэгтэйг Маргус Цахкна хэлэв. Угтаа бол Оросын нутаг дэвсгэрийг тойрч гарах өөр зам хэдийнэ баригдаад дууссан аж. Мөн одоогийн зохицуулалтыг түүхэн гажуудал гэж тэр хэллээ.

Өнгөрсөн сард Оросын сөнөөгч онгоцууд Эстонийн агаарын орон зайд зөвшөөрөлгүй нэвтэрч, 12 минутын турш эргэлдсэний дараачаас тус улс өндөржүүлсэн бэлэн байдал зарлаад буй. Хэдийгээр оросууд өмнөхөөсөө арай илүү зоригтой, ил тод ажиллаж байгаа ч хил дээр нөхцөл байдал тайван хэвээр байна.