Үндэсний статистикийн хорооноос бараа бүтээгдэхүүн, инфляцын түвшний мэдээллийг танилцууллаа. Ингэхдээ хэрэглээний бараа, үйлчилгээний үнэ 2025 оны есдүгээр сард улсын хэмжээнд өмнөх оны мөн үеэс 9.0 хувиар, өмнөх сараас 0.2 хувиар тус тус өссөн байна. Энэ нь өмнөх оны мөн үетэй харьцуулахад улсын хэмжээнд барааны бүлгийн үнэ 7.0 хувь, үйлчилгээний бүлгийн үнэ 15.0 хувь, хүнсний бүлгийн үнэ 10.4 хувь, хүнсний бус бүлгийн үнэ 8.5 хувиар тус тус өсжээ.

Төвийн бүсэд барааны бүлгийн үнэ 7.5 хувь, Улаанбаатар хотод үйлчилгээний бүлгийн үнэ 16.2 хувь, хүнсний бүлгийн үнэ 11.2 хувь, хүнсний бус бүлгийн үнэ 9.4 хувиар тус тус өссөн нь хамгийн өндөр байна.

Хэрэглээний бараа, үйлчилгээний үнэ 2025 оны есдүгээр сард өмнөх оны мөн үеэс 9.0 хувиар өсөхөд хүнсний бараа, ундаа, усны бүлгийн үнэ 10.6 хувь (согтууруулах бус ундааны дэд бүлгийн үнэ 10.3 хувь), хувцас, бөс бараа, гутлын бүлгийн үнэ 7.9 хувь, орон сууц, ус, цахилгаан, хийн болон бусад түлшний бүлгийн үнэ 19.4 хувь, гэр ахуйн тавилга, гэр ахуйн барааны бүлгийн үнэ 7.0 хувь, зочид буудал, нийтийн хоол, дотуур байрны үйлчилгээний бүлгийн үнэ 11.4 хувь, боловсролын үйлчилгээний бүлгийн үнэ 12.8 хувиар тус тус өссөн нь голлон нөлөөлсөн аж. 

Харин инфляцын түвшин буюу хэрэглээний бараа, үйлчилгээний үнэ 2024 оны 9 дүгээр сард 6.3 хувь байсан бол 2025 оны 9 дүгээр сард 9.0 хувь болж, өсөлтийн хурдац өмнөх оны мөн үеэс 2.7 нэгж хувиар нэмэгджээ. Улсын инфляцад бензин, түлшнээс бусад импортын барааны үнэ 2.2 нэгж хувиар, мах, хатуу түлшнээс бусад дотоодын барааны үнэ 5.3 нэгж хувиар тус тус нөлөөлсөн байна.