"NEWS" агентлаг өнгөрөгч долоо хоногийн онцлох сурвалжлагуудыг хүргэж байна.

НАРАНТУУЛ ЗАХ ХҮНГҮЙ БОЛСОН ҮГҮЙГ Х.НЯМБААТАР ӨӨРӨӨ ИРЖ ҮЗЭХ ХЭРЭГТЭЙ

Мөн "Нарантуул" олон улсын худалдааны төвд хүн очихгүй болсон байна, нүүлгэнэ гэж хотын дарга Х.Нямбаатар сүүлд мэдэгдсэн. Гэвч бодит байдал дээрээ "Нарантуул" худалдааны төвийн хөл хөдөлгөөн улирал солигдох үе, баяр наадмын үеэр ачаалал эрс нэмэгддэг талаар худалдаа эрхлэгч Б.Халиун хэлж байна. Б.Халиун "Нарантуул" захад лангуу ажиллуулаад 10 гаруй жил болж байгаа аж. Ингэхдээ хүнгүй үед доод талдаа 500 мянган төгрөг, дээд талдаа гурван сая төгрөг хийдэг ажээ. Тэрбээр хэлэхдээ "Хотын дарга Х.Нямбаатар Нарантуул захаар хүн орохоо байсан гэж хэлсэн байсан. Үнэхээр хүн орохгүй байгаа, худалдан авалт байхгүй байгаа эсэхийг өөрийн нүдээр ирж харах хэрэгтэй. Тэгж байж нүүлгэх талаар ярь. Нарантуул худалдааны төв бол олон улсын худалдааны төв, эндээс зүүн аймаг болон баруун аймгийн хүмүүс ирж худалдан авалт хийдэг. Тийм байхад хүнгүй болжээ гэж хэлж байгаа нь худал. Үнэхээр хүнгүй бол энд лангуу авч түрээс өгөх шаардлагагүй. Иймд худал мэдээллээр иргэдийн тархийг угаахаа болох хэрэгтэй" гэв.

Наймаачин У.Сүхболд хэлэхдээ "Миний хувьд сүүлийн 20 гаруй жил энд хүүхдийн тасаг дээр хүүхдийн хувцас зарж байна. Хотын даргын хийсэн мэдээллийг хэдэн газраас харсан. Хараад гайхаж байлаа. Үнэхээр очих хүнгүй болсон гэж хэлсэн байсан. Хотын дарга зах дээрээс худалдан авалт хийхгүй нь тодорхой. Тийм байхад өөрөө ирж авахгүй юм гэхэд өрөөл нэгэн ирэх замыг нь хааж болохгүй байх. Хотын даргыг өөрийн биеэр ирж үз гэж хэлмээр байна. Бид хүнгүй, ашиггүй бол өдөржин энд даарч суух шаардлага байхгүй. Ашигтай, худалдан авч нар байгаа болохоор энд сууж байна. Гэхдээ үнэхээр энэ хэсгийн талбайг чөлөөлж захыг өөр тийшээ нүүлгэнэ гэвэл өөр арга байхгүй байх. Х.Нямбаатар түцнүүдийг ямар аймар аргаар зөөж байгааг харсан учир тийм зүйл Нарантуул худалдааны төв дээр л битгий гараасай гэж хүсч байна. Хотынхоо сайн сайхны төлөө бол лангуугаа буулгаж чадна" гэлээ. Дэлгэрэнгүйг эндээс уншина уу.

СУРВАЛЖЛАГА: ХАГАС КОКСОН НҮҮРСИЙГ ЛХАГВА ГАРИГААС БОРЛУУЛЖ ЭХЭЛНЭ

Шинээр борлуулалтанд гарах хагас коксон түлш нь өмнө хэрэглэж байсан мидлингтэй сайжруулсан шахмал түлшнээс илүү боловсруулсан, технологийн хувьд дэвшилттэй бүтээгдэхүүн гэж мэргэжлийн байгууллагууд үзэж байгаа. ШУА-ийн Хими, химийн технологийн хүрээлэн болон холбогдох лабораториудын хийсэн шинжилгээгээр хагас коксон түлш нь сайжруулсан шахмал түлшнээс 45-50 хувиар бага бохирдол, 25 хувиар бага угаарын хий ялгаруулдаг бөгөөд нарийн ширхэгт тоосонцор буюу хүний уушгинд шүүгддэггүй PM2.5 хэмжээтэй тоосонцрын ялгаралтыг 80 хүртэл хувиар бууруулах чадвартай гэжээ. Энэ нь гэр хорооллын яндангаас агаарт дэгдэх бохирдлыг ихээхэн бууруулна гэсэн үг юм. Ингэснээр нийт Улаанбаатар хотын агаарын бохирдол энэ өвөл 45-50 хувиар буурах боломжтой гэж албаныхан тооцож байна.

Шинэ түлшний техникийн үзүүлэлтийг олон улсын стандартад нийцүүлэн боловсруулсан бөгөөд MNS5679:2025 шинэ стандарт батлагдан мөрдөгдөж эхэлсэн. Уг стандартад зааснаар хагас коксон шахмал түлш нь 5500 ккалл/кг-аас багагүй илчлэгтэй, 0.5 хувиас ихгүй хүхэртэй, 12 хувиас ихгүй дэгдэмхий бодис, 6 хувиас ихгүй чийглэг, 20 хувиас ихгүй үнслэгтэй байх шаардлагыг хангасан байх ёстой. Мөн 25 кг шуудай түлшний хувьд үйрмэгийн хэмжээ нийт жингийн 5 хувиас хэтрэхгүй байх нөхцөлийг тусгасан байна. Дэлгэрэнгүйг эндээс уншина уу.

ЭЦГИЙН ЗАМААР ХҮҮ — ДЭЭД ЛИГИЙН ТАЛБАЙГ "ЭЗЭГНЭСЭН" ААВ, ХҮҮ ХОЁР

Монголын сагсан бөмбөгийн дээд лигийн шинэ улирал тун сонирхолтой эхэлж, багууд зуны гэрийн даалгавраа шалгуулж байна. Зарим багууд эрс өөрчлөлтийг хийж, шинэ өнгө төрхийг бүрдүүлсэн бол зарим нь өмнөх бүрэлдэхүүнээ сайжруулж, туршлагажуулж өрсөлдөөнд орж иржээ. Энэ долоо хоногт нэгэн түүхэн үйл явдал болсон нь дээд лигт тоглосон аав, хүү нарын эгнээ нэгээр тэлэв. Тодруулбал, Дархан Юнайтедын багийн шинэ тамирчин И.Эрхэмбилэг талбайд гарснаар аавынхаа адилаар дээд лигийн тоглогч боллоо. Түүний аав нь Монголын сагсан бөмбөгийн амьд домог Г.Ихбаяр билээ.

Дээрх үйл явдалтай холбогдуулан та бүхэндээ дээд лигт тоглосон аав, хүү нарыг танилцуулъя. Дэлгэрэнгүйг эндээс уншина уу.

ШИНЭ ТӨВ ЦЭВЭРЛЭХ БАЙГУУЛАМЖИЙН ХИЙ ҮЙЛДВЭРЛЭХ АЖИЛ ХОЙШИЛЖЭЭ

Шинэ Төв цэвэрлэх байгууламж албан ёсны нээлтээ хийгээгүй ч эхнээсээ ашиглалтад орсон гэдгийг албаныхан мэдээллээ. Энэ талаар Улаанбаатар хотын төв цэвэрлэх байгууламжийг шинээр барих төслийн зохицуулагч Г.Чулуунбатаас тодруулахад, “Шинээр барьж байгуулсан Төв цэвэрлэх байгууламж нь Улаанбаатар хотын нийт шугам сүлжээний хаягдал усны 15 хувийг цэвэрлэж эхэлсэн. Ойрын хугацаанд хуучин Төв цэвэрлэх байгууламжийн хаягдал усны 50 хувийг хүлээн авч, туршилтынхаа хэмжээг нэмэгдүүлэхээр төлөвлөж байна. Байгаль орчинд стандартад нийцсэн ус нийлүүлэх ажил хэрэгжиж эхэлсэн. Харин хий үйлдвэрлэж эрчим хүч гаргаж авах ажил нь 2026 оны зургадугаар сар хүртэл хойшилсон” гэв.

Шинэ Төв цэвэрлэх байгууламж нь Сонгинохайрхан дүүргийн 20 дугаар хорооны нутаг дэвсгэрт, одоогийн цэвэрлэх байгууламжийн баруун талд био цөөрмийн талбайд баригдаж байна. Нийт 17.6 га газрыг ашиглахаар төлөвлөсөн байдаг.

Улаанбаатар хотын төв цэвэрлэх байгууламжийг шинээр барих төслийг 2020 онд эхлүүлсэн. Энэ том бүтээн байгуулалтын зургадугаар сарын сүүлчээр Улсын комисст үе шаттайгаар хүлээлгэн өгч, 2025 оны аравдугаар сард бүрэн ашиглалтад оруулна гэдгийг албаныхан мэдээлж байсан юм. Шинэ Төв цэвэрлэх байгууламж ашиглалтад орсноор 160 ажилтны орон тоо шаардлагатай. Дэлгэрэнгүйг эндээс уншина уу.