Израиль, Хамасын хооронд гал зогсоох хэлэлцээрийн эхний үе шат хэрэгжиж эхэлснээр орон гэрээсээ дүрвэсэн байсан палестинчууд эргэн ирж эхэллээ. Тэднийг Израилийн армийн шаардсанаар нутгийн өмнөд хэсэг рүү дүрвэсэн байв. Өдгөө тэдний зарим нь ачаа тээш дүүрэн чихсэн машинаар, зарим нь хоёр хөлөөрөө хойд нутгийг чиглэн айсуй.

"Янз бүрийн мэдрэмж холилдож байна. Сайхан байгаа ч гэлээ бид сүйрч нурсан газар луу буцаж байна шүү дээ", "Сүүлчийн удаа л байгаасай. Энэ үеийг санан дурсах ч гэлээ дахин давтахгүй байгаасай" гэж нутаг буцагсад ярьж байна.

Албаны эх сурвалжийн хэлснээр төлөвлөгөөний хэрэгжилтийг хянахын тулд АНУ тээвэр, төлөвлөлт, аюулгүй байдал, ложистик, инженерийн чиглэлээр мэргэшсэн 200 цэргээ Газын зурваст илгээж буй. Тэдэнтэй хамт Египет, Катар, Турк улсаас ирсэн цэргүүд төлөвлөгөөний хэрэгжилтэд хяналт тавьна.