ОХУ-ын дроны халдлага нэмэгдэж байгаатай холбогдуулан фронтын ойролцоох Краматорск хот болон ойролцоох тосгон, суурингын бага насны хүүхдүүд болон тэдний асран хамгаалагчдыг нүүлгэн шилжүүлж байна гэж хотын захиргаа мэдэгдэв. Дайнаас өмнө 147 мянга орчим хүн амтай байсан Краматорск хот нь Донецкийн бүс нутагт, фронтын шугамаас ойролцоогоор 20 километр зайд оршдог. Энэ бүс нутагт нь дайны гол талбар болж байна.

“Краматорск хотын зарим хэсгийн аюулгүй байдлын нөхцөл байдал дордсонтой холбоотойгоор хүүхэдтэй гэр бүлүүдийг албадан нүүлгэн шилжүүлэх тушаал гаргасан” гэж хотын захиргаа нийгмийн сүлжээгээр дамжуулан мэдэгджээ. “Эдгээр суурин газрын оршин суугчид, ялангуяа харамсалтай нь одоо хүртэл тэнд амьдарч байгаа хүүхэдтэй гэр бүлүүд албаныхны тусламжтайгаар яаралтай нутгаа орхих ёстой” гэж мэдэгдэлд нэмж дурдсэн байна.  Албаныхны хэлснээр, Оросын батлан хамгаалах хүчин өртөг багатай, "first-person-view" дроны халдлагыг эрчимжүүлж байгаа тул сүүлийн саруудад фронтын нөхцөл байдал эрс муудсан. Краматорск бол Донецкийн бүс нутагт Украины хяналтад байгаа хамгийн том иргэний төв бөгөөд цэргийн гарнизон хот юм. Тус хотыг 2014 онд Кремлийн дэмжлэгтэй салан тусгаарлагчид түр хугацаанд эзэлж байжээ.