Хятадын ерөнхий сайд Ли Цян Хойд Солонгосын эрх баригч Хөдөлмөрийн нам байгуулагдсаны 80 жилийн ойн арга хэмжээнд оролцохоор Пүрэв гаригт Пёньянд иржээ. Айлчлал гурван өдөр үргэлжилнэ. Энэ нь Хятадын хоёрдугаар удирдагч 16 жилийн дараа анх удаа Хойд Солонгост айлчилж буй тохиолдол. Анх 2009 оны аравдугаар сард тухайн үеийн ерөнхий сайд Вэн Жиабао Пёньянд айлчилж байв.

Хойд Солонгосын удирдагч Ким Жон Ун өнгөрсөн сард Бээжинд айлчилж, Хятадын цэргийн парадад оролцсон. Энэ үеэр тэр Ши Жиньпин, Владимир Путин нартай нэгдэж, барууны орнуудын эсрэг эв нэгдэлтэй байгаагаа харуулсан билээ.

Ли Цян Хойд Солонгост ирмэгцээ хоёр орны уламжлалт найрамдалт харилцааг онцолж, цаашид ч улам бэхжүүлнэ гэдгээ амлажээ. Тэрбээр "Сүүлийн жилүүдэд Ши Жиньпин, Ким Жон Ун нарын стратегийн удирдлага, хувийн хүчин чармайлт дор хоёр улсын харилцаа шинэ эрч хүчээр дүүрэн байна" гэсэн юм.

Хойд Солонгос 2015 онд эрх баригч намын 70 жилийн ойд зориулсан цэргийн парад зохион байгуулахад Хятадаас Улс төрийн товчооны Байнгын хорооны тавдугаар зэргийн гишүүн Лю Юньшань оролцож байжээ. Энэ удаагийн баярт ОХУ-ын Аюулгүйн зөвлөлийн орлогч дарга Дмитрий Медведев, Вьетнамын удирдагч То Лам нар оролцоно.