Хойд Солонгос улс өнөөдөр (2025.10.10) тус улсын эрх баригч Хөдөлмөрийн нам байгуулагдсаны 80 жилийн ойг тэмдэглэж байна. Өмнөд Солонгосын цэргийн байгууллага энэ сарын эхээр Хойд Солонгос хэдэн арван мянган хүнийг оролцуулсан цэргийн парадад бэлтгэж байгааг мэдээлсэн юм.

Энэ нь Хойд Солонгосын тогтмол зэвсэгт хүчнийхэн 2023 оны долдугаар сард, Солонгосын дайн зогссоны 70 жилийн ойгоор парад хийснээс хойш анх удаа болох парад юм. Шинжээчдийн хэлж буйгаар, Хойд Солонгос энэхүү парадын үеэр шинэ зэвсгээ үзүүлнэ. Өнгөрсөн сард Хойд Солонгосын удирдагч Ким Жон Ун Пёньяны дараагийн үеийн тив алгасагч баллистик пуужинд ашиглагдах хөдөлгүүрийн шаталтын туршилтыг удирдсан байна. Тус улс пуужингаа “Хвасон-20” гэж нэрлэжээ.

Мөн Ким өөрийн улс “шинэ нууц зэвсгүүдтэй болсон” гэж мэдэгдсэн байна.

Одоогоор БНХАУ-ын Төрийн зөвлөлийн Ерөнхий сайд Ли Чян болон ОХУ-ын хуучин ерөнхийлөгч Дмитрий Медведев нар Хойд Солонгост айлчилж байна. Хойд Солонгос улс БНХАУ, ОХУ зэрэг нөхөрсөг орнуудтайгаа эв нэгдэлтэй байгаагаа харуулах зорилготой бөгөөд АНУ-тай хэлэлцээ хийх тохиолдолд эдгээр улсуудын дэмжлэгийг авахыг зорьж байна.