ОХУ-ын ерөнхийлөгч Владимир Путин Лхагва гаригт Тажикистан дахь төрийн айлчлалаа эхлүүллээ. Гурван өдөр үргэлжлэх айлчлалын хүрээнд тэрбээр нэгэн цагт ЗХУ-ын бүрэлдэхүүнд байсан орнуудын удирдагчидтай уулзана. Тодруулбал, Душанбе хотноо болох Орос-Төв Азийн дээд хэмжээний уулзалтад Казахстан, Кыргызстан, Туркменистан, Узбекистаны удирдагчид оролцох юм. Үргэлжлээд Баасан гаригт тэд Армен, Азербайжан, Беларусийн удирдагчидтай нэгдэж, Тусгаар улсуудын хамтын нөхөрлөлийн өргөн хэмжээний уулзалтад оролцоно. Тусгаар улсуудын хамтын нөхөрлөл нь хуучн ЗХУ-ын бүрэлдэхүүнд байсан бусад орны эвсэл юм.

Барууны хориг арга хэмжээнүүдэд өртөөд буй Оросын хувьд Тажикистан тэргүүтэй Төв Азийн орнуудтай холбоо харилцаатай байх нь маш чухал юм.

Тажикистаны ерөнхийлөгч Эмомали Рахмон засгийн эрхийг 33 жил барьж байна. Зөвлөлтийн удирдагч нарын дундаас хамгийн урт хугацаанд засгийн эрхэнд байгаа нь өдгөө 73 настай Рахмон юм. Энэ урт хугацаанд тэрбээр засаглалыг нь эсэргүүцсэн хүмүүсийг нухчин дарж, няцааж, Үндсэн хуульдаа өөрчлөлт оруулсан.

Дашрамд дурдахад, Тажикистан бол Олон улсын эрүүгийн шүүхийн гишүүн улс. Иймд Олон улсын эрүүгийн шүүхийн тушаал ёсоор Путиныг нутаг дэвсгэрт нь нэвтрэх үед баривчлах журамтай. Гэсэн ч хоёр улсын улс төр, эдийн засаг, цэргийн гүнзгий харилцаа холбоог харгалзан үзвэл Путин баривчлагдах аюулгүй юм.

"Human Rights Watch" байгууллага Лхагва гаригт Путиныг баривчлахыг Тажикистанаас шаарджээ. Путиныг баривчлахгүй байх нь Украин дахь хохирогчдын зовлон зүдгүүрийг үл тоомсорлосон хэрэг болно гэж тус байгууллага анхааруулав.