Улаанбаатар хотод гол нэрийн барааны үнэ 2025 оны аравдугаар сарын 6-ны байдлаар өмнөх сараас 0.3 хувь, өмнөх долоо хоногоос 0.4 хувиар өссөн нь инфляцийн дарамт үргэлжилж буйг харуулж байна. Сүүлийн саруудад хүнсний барааны үнийн өсөлт бага зэрэг тогтворжсон ч суурь инфляцийн дарамт бүрэн буураагүй байна. Энэ нь ялангуяа сүү, цөцгийн тос, ургамлын тос зэрэг өрхийн өдөр тутмын хэрэглээний бүтээгдэхүүний үнийн өсөлтөд илүүтэй нөлөөлж байна. Тухайлбал, "Шинэ Сүү" нэг литрийн үнэ өмнөх сараас 3.6 хувиар, “Цөцгийтэй тараг” 5.1 хувиар, харин цөцгийн тос 7.5 хувиар өссөн байна.

Харин хүнсний ногооны хувьд намрын ургац хураалтын үе эхэлсэнтэй холбоотойгоор үнэ харьцангуй буурчээ. Тухайлбал, төмсний үнэ өмнөх сараас 10 орчим хувиар, луувангийн үнэ 12 хувиар, хүрэн манжингийн үнэ 5.6 хувиар буурсан үзүүлэлттэй байна. Гэвч байцаа, сонгины үнэ бага зэргийн хэлбэлзэлтэй өссөн нь ажиглагдаж байна.

Махны үнэ харьцангуй тогтвортой байгаа боловч адууны махны үнэ 2.1 хувиар өсч, хонины болон үхрийн махны үнэ бага зэрэг буурсан үзүүлэлттэй байна. Шатахууны үнэ сүүлийн долоо хоног, сарын хугацаанд огт өөрчлөгдөөгүй бөгөөд Аи-92 бензин 2590 төгрөг, дизелийн түлш 2940 төгрөг хэвээр байна. Гэсэн хэдий ч шатахууны үнийн тогтвортой байдал нь хүнсний бүтээгдэхүүний үнийн өсөлтөд тодорхой хэмжээнд сааруулах нөлөө үзүүлж байгаа ч инфляцийн дарамтыг бүрэн бууруулж чадахгүй байна. Эдийн засагчдын үзэж буйгаар, ирэх саруудад түүхий эдийн дэлхийн зах зээлийн үнэ болон дотоод тээврийн зардал, улирлын нөлөөлөл нь барааны үнийн хэлбэлзэлд голлон нөлөөлөх төлөвтэй байна. Өрхийн түвшинд үнийн өсөлт бага мэт боловч цалин, орлогын өсөлттэй харьцуулахад бодит худалдан авах чадвар буурч байгааг анхаарах шаардлагатай юм. Инфляцийн дарамт ийм байдлаар үргэлжилбэл ирэх саруудад өрхийн хэрэглээ хумигдаж, дотоодын эрэлт буурах эрсдэлтэй гэж шинжээчид үзэж байна.

Эх сурвалж: Үндэсний статистикийн хороо