ОХУ-ын бүс нутаг даяар шинээр цэрэгт элсэгчдэд илүү их мөнгө амалж эхэлжээ. Зарим бүс нутагт шинэ элсэгчдэд хуучнаасаа дөрөв дахин их мөнгө амлаж байна. Тодруулбал, Воронеж муж шинэ цэргүүдэд өмнөхөөсөө дөрөв дахин өссөн цалин буюу 2.1 сая рубль амлажээ. Харин Сибирийн Тюмень муж арваннэгдүгээр сараас өмнө амжиж шинээр цэрэгт элсэгчдэд засгийн газраас олгодог 400 мянган рублиэс гадна нэг удаагийн гурван сая рублийн урамшуулал олгоно гэж мэдэгдээд байна.

Гурван сая рубль гэдэг бол Тюменьд ажиллаж, амьдардаг энгийн хүний гурван жилин цалин юм.

Тамбов, Краснодар, Курган, Алтай, Татарстаны бүс нутгуудын засаг захиргаа ч ижил төстэй амлалтуудыг өгч эхлээд байна. Тэдний амлаж буйгаар цэргүүдийн сарын дундаж цалин 210 мянган рублиэс эхлэнэ. Энэ нь энгийн оросуудын цалинг хоёр үржсэн мөнгөн дүн болно.

Цэргийн шинжээчдийн хэлж буйгаар хуучны үзэл суртлын шинж чанартай кампанит ажлууд өдгөө Украинд тулалдах хангалттай сэдэл болж чадахгүй болжээ. Өөрөөр хэлбэл, цэрэгт элсүүлэх кампанит ажил үзэл суртал гэхээсээ илүү нарийн төвөгтэй бизнес загвартай болж буйг АНУ-д төвтэй Дайны судалгааны хүрээлэн мэдэгдэв.

Украин дахь дайн 2022 оны хоёрдугаар сард эхэлснээс хойш ОХУ-ын нэг сая орчим цэрэг нас барж, шархадсан гэх тооцоо бий. Ийм их алдагдалтай байгаа үед хүн хүч гэдэг зүйл довтолгоог дэмжих гол түлхүүр болно гэдгийг Оросын Батлан хамгаалахын сайд Андрей Белоусов наймдугаар сард мэдэгдсэн билээ.

Тухайн үед Белоусов цэрэг татлага амжилттай явагдаж байгаа гэж хэлсэн ч бие даасан мөрдөн байцаах агентлаг "IStories" өөр тайлан дэлгэв. Албан ёсны баримт бичгээс харвал 2025 оны хоёрдугаар улиралд ердөө 37900 цэрэг л шинээр гэрээ байгуулжээ. Энэ нь жилийн өмнөхөөс 2.5 дахин багассан тоо юм.