Цахим спортын "CS2" төрлийн томоохон тэмцээнүүдийн нэг болох "ESL Pro League"-ийн 22 дахь улирал үргэлжилж байна. Тэмцээний хоёрдугаар шатны ээлжит тоглолтууд өчигдөр/2025.10.07/ болов. Энэ өдөр "The MongolZ" баг испани тамирчидтай Францын шинэхэн баг "Gentle Mates"-ийг 2-0 гэсэн харьцаатай хожиж, 2-2 амжилттай болжээ. Ингэснээр тэд өнөөдөр 19:30 цагаас плей-оффд шалгарах эсэхээ шийдэх чухал тоглолтыг Украины "NaVi"-ийн эсрэг хийхээр болж байна.

Өчигдрийн тоглолтын үр дүнгээс гадна тоглолтын явцад нэгэн анхаарал татахуйц үйл явдал болсон нь "Gentle Mates" багийн тоглогч Антонио Мартинез буюу "Martinez"-ийн хувьд "Mirage" мап дээрх тоглолтын үеэр "The MongolZ"-ийн тамирчдыг "Jackie Chan" гэсэн нь олны дургүйцлийг хүргэв. Өөрөөр хэлбэл, испани тамирчныг арьс өнгөөр ялгаварлан гадуурхсан үг хэллээ гэж бухимдах хүн олон байна.

"The MongolZ" бол монгол баг,  Жеки Чан бол Хонг Конгийн алдарт жүжигчин. Мартинезын хэлсэн үгийг утгачилбал бүх Ази хүмүүсийг адилхан харагддаг гэсэн арьс өнгөөр ялгаварлан гадуурхсан хэвшмэл үг юм. 

Удалгүй "Martinez" өөрийн Х хаягаараа дамжуулан хэлсэн үгэндээ уучлалт гуйжээ. Түүний бичвэрийг товчлон хүргэвэл "Тоглолтын үеэр The MongolZ-ийн эсрэг хэлсэн үгэндээ гүнээ хүлцэл өчихийг хүсч байна. Миний хэлсэн үгс ямар үл хүндэлсэн, өвтгөм гэдгийг ойлгож байна. Соёлын ялгаанаас болж хэлсэн үгийнхээ утгыг ойлгосонгүй. Арьс өнгөний үзэл, ялгаварлан гадуурхах утгыг агуулаагүй болно. The MongolZ багийнхан, багийн нөхөд, хамт олноосоо үнэхээр уучлалт хүсч байна. Багийн зүгээс авах ямар ч арга хэмжээг хүлээн авахад бэлэн байна. Ийм зүйл дахиж болохгүй" гэжээ.

The MongolZ багийн албан ёсны Х хаяг ч түүний жиргээний дор "Гэм буруугүй" гэх утгатай үгийг бичжээ.