УИХ-ын 70 гаруй гишүүн нэгдээд нүүрсний хулгайд нэр холбогдсон Д.Амарбаясгаланд “Ажлаа өгөөд шалуулчих” гэх товч утгатай ёс зүйн шаардлага хүргүүллээ. Төрийн эрх барих дээд байгууллагын даргаар ажиллаж байгаа хүн цэвэр байх ёстой гэсэн гишүүдийн шаардлага зүй ёсных. Дээрээс нь тэд огцор, боль гэж муйхарласангүй. Парламентын засаглал, төлөвшилд хар толбо үүсэх вий гэсэн болгоомжлолын үүднээс нэрээ цэвэрлээд ир гэчихлээ. Монголын шинэ үеийн парламентын түүхэнд УИХ-ын даргаар ажиллаж байгаа хүнд 70 гаруй гишүүн гарын үсгээ зураад ёс зүйн шаардлага тавьсан анхны тохиолдол боллоо.

УИХ-ын дарга Д.Амарбаясгалан гишүүдийн тавьсан шаардлагын хариуд жагсаалтаар сонгогдсон голдуу гишүүдээр Ерөнхий сайдыг огцруулах бичиг өргөн бариулав. Би үхэхээр чи үх гэдэг шиг хуулийн өмнө очих болохоороо гуравхан сар ажиллаж байгаа Засгийн газраар туг тахихаар яаравчилсан нь улс төрийн хямралыг улам дэврээлээ. Хуулийн өмнө очоод гэм буруугаа шалгуулчих гэхээр Засгийн газар огцрох ёстой гэж гөжүүдэлж, төрийн институц хоорондын зөрчил болгож байгаа нь айсан хүнд аргал хөдлөхийн үлгэрийг санагдуулах ч шиг. Гарын үсэг зурсан нь 70 гаруй гишүүн боловч тэдний ард шударга ёсыг хүсэмжилсэн сонгогчид байгааг умартах учиргүй байсан юм.

Хуулийн байгууллагад шалгуулна гэдэг хүн айгаад, нохой гаслаад байх зүйл огт биш. Өнөөх муу нэртэй Ц.Элбэгдорж УИХ-ын гишүүн байхдаа улсын нууц задруулсан гэх хэрэгт нэр холбогдмогцоо өөрийн хүсэлтээр шалгуулж байсан бэлээхэн жишээ бий. Н.Номтойбаяр мөн л хэрэгт шалгагдаж байхдаа шийр зааж УИХ-ын гишүүнийхээ бүрэн эрхээс өөрийн хүсэлтээр түдгэлзэж, хуулийнханд шалгах боломж нээж өгч байв. Одоогийн УИХ-ын дэд дарга Б.Пүрэвдорж Гадаадын иргэн, харьяатын гакрын даргаар ажиллаж байхдаа албан тушаалаасаа татгалзаж, хуулийн байгууллагаар шалгуулах замаар үнэнийг тогтоолгож явсан намтартай улстөрч. Ийм эрүүл жишиг Монголын улс төрд, парламентын түүхэнд бий.

Буруугүй хүнд айж бэргэх шалтгаан байдаггүй. Олон нийтийн эргэлзээг тайлж, хуулийн байгууллагаар шалгуулчихдаг жишгийг Д.Амарбаясгалан уландаа гишгэж таарахгүй. Энэ нэг хүний, нэг улстөрчийн асуудал ч биш. Парламентын засаглалын дархлаа, төрд итгэх олон түмний итгэлийг сэргээх гээд тоочвол олон ач холбогдолтой. Д.Амарбаясгалан шалгуулахгүй ээ гээд албан тушаалтайгаа зууралдаж, Засгийн газраараа туг тахих гэж улайрч байгаа нь хүмүүсийн эргэлзээг улам нэмж, нүүрсний хулгайд холбоотой юм байна гэх итгэл үнэмшлийг бататгачихлаа. Шалгуулаад нэр төрөө цэвэрлэчих эр зориг Д.Амарбаясгалангаас гарсангүй. Гэмт хүн гэлбэлзэнэ гээч нь жинхэнээсээ болоод явчихлаа даа.

Эх сурвалж: Өдрийн сонин